Sawirro: DFS oo soo bandhigtay burburka Gaari ismiidaamin oo manta lagu weeraray ciidamada uu tababaray Mareykanka

[Deeq A.]

Muqdisho (Caasimada Online)-Warar dheeraad ah ayaa waxa uu kasoo baxayaa weerar Ismiidaamin ah oo manta lagu qaaday kolonyo ay la socdeen ciidamo ka tirsan kuwa dowladda Soomaaliya gaar ahaan kuwa Mareykanka uu tababaray ee Saldhiga ku leh Garoonka Balli-doogle.

Weerarka oo loo adeegsaday Gaari nooca raaxada ah oo laga soo buuxiyay waxyaabaha Qarxa ayaa waxaa ka dhashay khasaaro kala duwan iyo burbur soo gaaray gaadiidka qaar.

Kolonyada la weeraray ayaa xiligaa maraayey meel u dhow Koontoroolka baar Ismaaciil ee degmada Afgooye, iyadoo Qaraxa kadib ay ciidamadu ooda ka qaaden rasaas xoogan.

Goobjoogayaal ayaa sheegaya in Khasaaraha uu kor u dhaafayo dhowr dhimasho iyo Dhaawac, hase ahaatee Dowlada Somalia ayaa mugdi galisay Khasaaraha Qaraxa.

Maxamed Abuukar Isloow Ducaale, Wasiirka Amniga Xukuumadda Federaalka Somalia, ayaa sheegay inuu jiro waxyeelo, hase ahaatee aanu gaarsiisneyn heerkii ay ugu tallo galeen al-Shabaabka.

Wasiir Ducaale ayaa beeniyay Khasaaro ciidamada kasoo gaaray Qaraxa, waxa uuna cadeeyay in maleeshiyaadka uu alle ku celiyay  dhagartooda, sida uu hadalka u dhigay.

Maxamed Abuukar Isloow Ducaale ayaa sheegay inuu ku dhintay ninkii waday gaarigaasi siday Walxaha Qarxa.

Al-shabaab oo mas’uuliyadda weerarkan sheegtay ayaa ku faanay in ay ku dileen 12 Askari kuwo kalen ku dhaawaceen.