DEG-DEG: Qarax ismiidaamin ah oo lala eegtay Ciidammo ka tirsan kuwa Dowladda Somalia

[Deeq A.]

Afgooye (PP) ─ Ciidammo ka tirsan kuwa dowladda Somalia ayaa Qarax is-miidaamin ah lagula beegsaday koontaroolka Baar Ismaaciil ee Degmada Afgooye ee gobolka Shabeellada Hoose, iyagoo ka yimid saldhigga ciidamada ee Balli-doogle kuna socday Muqdisho.

Kolonyada gaadiidka ah ayaa la sheegay inay soo gaartay khasaare aad u xooggan, inkastoo aan la ogeyn inta uu le’g yaha, waxaase dad goobta ku sugna ay sheegeen inay dhinteen askar iyo dad shacab ah oo goobta ka dhawaa.

Goobjoogayaal la hadlay warbahinta aya asheegay in maydadka lix qof ay goobta ku arkeen, dhaawacyo dhawr ah ay jiraan, waxaana ciidamadan lala beegasday gaari waxyaabaha qarxa laga soo buuxiyay.

Weerarka ayaa waxaa mas’uuliyaddiisa durba sheegatay kooxda Al-shabaab, iyagoo warar ay baahiyeen ku sheegay inay ku dileen tobaneeyo ka mid ah askarta ciidamada dowladda Somalia.

Sidoo kale, ciidankii weerarka ka badnaaday ay goobta oo dhan xireen, isla markaana aysan jirin wax iska-horimaad ah oo qaraxa kaddib dhacay, balse waxaa jirta cabsi weyn oo goobta laga dareemayo.

Kooxda Al-shabaab ayaa marka la gaaro bisha Ramaaan waxay kordhiyaan weerarrada ay ka geysanayaan deegaannada ay dowladda Somalia xukunto oo ay ku jirto Muqdisho oo xalay ay dilal kala duwan ka dhaceen.

Ugu dambeyn, Dowladda Somalia ayaan weli ka hadlin khasaaraha qaraxaan kasoo gaartay kolonyadii ciidamada dowladda Somalia ee la weeraray, iyadoo weerarkan uu imaanayo xilli uu muran adag u dhexeeya maamullada dalka ka jira iyo dowladda federaalka ah.

Wixii kasoo kordha Qaraxan waxaad kula socon doontaan wararkeenna soo socda.

PUNTLAND POST

The post DEG-DEG: Qarax ismiidaamin ah oo lala eegtay Ciidammo ka tirsan kuwa Dowladda Somalia appeared first on Puntland Post.