Xiisadda khaliijka: DF oo wadda qorshe cusub oo maamul goboledyada ah

[Deeq A.]

Muqdisho (Caasimada Online) – Warar hoose oo aan heleyno ayaa sheegaya in Dowlada Federaalka ah ee Somalia ay wado qorsho lagu shirinaayo Hogaamiyayaasha maamul Goboleedyada dalka.

Shirkaan oo ka duwanaan doona kuwii hore ayaa waxa uu qorshuhu yahay in Hogaamiyayaasha maamulada looga tiro aaminaanshiyaha Imaaraadka Carabta ee uu Khilaafka kala dhexeeyo Somalia.

Qorshaha ugu weyn ee shirka ayaa ah sida maamulada ka jira dalka ay u qaadan lahaayen fakirada Dowlada isla markaana ay qeyb uga noqon lahaayen go’aanada Dowlada.

Dowlada Somalia ayaa caqabado kala duwan kala kulmeysa Hogaamiyayaasha maamulada oo intooda badan garab u noqday Dowlada Imaaraadka oo si cad uga soo horjeedo hanaqaadka Somalia.

Xogta aan heleyno ayaa muujineysa in Dowlada Federaalka ay Hogaamiyayaasha maamulada gaarsiisay qorshaha ay ku dooneyso inay ku qabato Shirka walow aan wali loo sameyn cayimaad.

Sidoo kale, Dowlada Somalia ayaa aad uga didsan qodobo laga soo saaray shirka Hogaamiyayaasha maamulada ugu soo xirmay magaalada Baydhabo ee xarunta maamulka Koonfur Galbeed.

Ma cadda saameynta uu Hogaamiyayaasha iyo maamuladooda ku yeelan doono shirka ay qorsheyneyso Dowlada ee culeyska lagu saarayo Imaaraadka carabta.

Caasimada Online
Xafiiska Muqdisho
Caasimada@live.com