Dil cusub oo noociisa aan horay loo arag oo ka bilowday magaalada Muqdisho

[Deeq A.]

Muqdisho (Caasimada Online)- Dilkaani oo noociisa uu yahay mid ku cusub magaalada Muqdisho, ayaa waxa uu maanta ka dhacay Suuqa Bakaaraha gaar ahaan halka loo yaqaano Cabdalla Shideeye.

Dilka ayaa waxaa fuliyay maleeshiyaad ku hubeysnaa bastoolado oo ka tirsan al-Shabaab, waxaana lagu fuliyay wiil dhalinyaro ah.

Dilka ayaa inta uu socday waxa ay maleeshiyaadka duubanayeen Muuqaalka dilka,waxa uuna dilkaasi noqonayaa mid aan noociisa horay uga dhicin magaalada Muqdisho.

Goobjoogayaal ayaa sheegay ragga hubaysan inta ay dilka geysanayeen inay duubanayeen Muuqaalka dilka iyo maydka marxuumka, taasi oo dadkii arkaayay argagax ku noqotay.

Ragga dilka gaystay ayaa tiradooda waxa ay aheyd Saddex ruux, oo mid kamid ah uu duubaayay Muuqaalka dilka, waxaana la xaqiijiyay in Marxuumka la dilay uu naafo ka ahaa gacanta.

Sidoo kale, dilalka ka dhici jiray magaalda Muqdisho ayaa ahaa mid aan la heyn Muuqaal ama sawirro, waxa uuna dilkaani cusub muujinayaa inay jirto habacsanaan dhanka amaanka ah.

Docda kale, Ciidamo ka tirsan Militeriga Dowlada ayaa maanta ruux Bajaajle ah ku dilay isgoyska Zoobe ee magaalada Muqdisho, waxaana dilka kadib goobta si xarago leh uga baxsaday Gaariga uu la socday Askariga dilka Geystay oo ahaa Cabdi Bile.

Caasimada Online

Xafiiska Muqdisho

Caasimada@live.com