Gaari Huba u rarnaa al-Shabaab & Raggii waday oo gacanta lagu dhigay

[Deeq A.]

Muqdisho (Caasimada Online)-Saraakiisha Taliska ciidamada Xoogga ee ka howlgala degmada Baardheere ee gobolka Gedo, ayaa sheegay inay gacanta ku dhigeen Hub u socday maleeshiyaadka al-Shabaab.

Hubkaani la qabtay ayaa saarnaa Gaari nooca waaweyn oo kusii jeeday maleeshiyaadka al-Shabaab waxaana Hubkaasi ku jiray rasaas kala ceyn ah.

Taliyaha ururka 49-aad ee Guutada 10-aad ee ciidanka xoogga dalka Soomaaliyeed Xidigle Faarax Maxamed Turbac oo la hadlay warbaahinta ayaa sheegay in ciidanka ay sidoo kale gacanta ku dhigeen 4 qof oo xiligaasi la socday gaariga ay ku jireen qoryaha iyo rasaasta.

Faarax Maxamed Turbac oo u waramaayay Idaacadda ku hadasha afka ciidamada qalabka sida ayaa sheegay in rasaasta ay ciidamada gacanta ku dhigeen ay tiro ahaan gaareyso 15,000 oo ah rasaasta loo isticmaalo qoryaha AK-47 ah iyo qoriga daba-jeexa.

Faarax Maxamed Turbac, waxa uu intaa raaciyay inay la socdeen qoryo cusub oo dhammaantooda loo waday maleeshiyaadka al-Shabaab oo fariisin ku leh tuulada Ray’dab oo 40-KM u jirta degmada Baardheere.

Waxa uu intaa raaciyay in Hubkaasi uu yahay kan lagu leyn lahaa ciidamada Qaranka ee ka hor dagaalamaaya al-Shabaab.

Dhinaca kale, maleeshiyada al-Shabaab ayaan weli ka hadal wararka sheegaya in laga qabtay Gaari iyo Hubkii uu waday.

Caasimada Online

Xafiiska Muqdisho

Caasimada@live.com