Duqeyn lixaad leh oo ka dhacday Gobolka Shabeellaha Hoose & Khasaaro kala duwan oo ka dhashay

[Deeq A.]

Muqdisho (Caasimada Online)-Wararka ka imaanaya Gobolka Shabellaha Hoose ayaa sheegaya in halkaa ay ka dhacday duqeyn diyaaradeed oo lala eegtay goobo ay ku sugnaayen maleeshiyaadka al-Shabaab.

Duqeynta ayaa la xaqiijiyay inay geysatay Diyaarad dagaal oo laga leeyahay dalka Mareykanka, waxa ayna xoogeeda ka dhacday deegaano u dhow degamda Bariire.

Duqeyntaan oo aad u xooganeyd ayaa dhacday Saqdii dhexe xalay, waxa ayna dadka deegaanka soo sheegayaan in duqeynta kadib ay maqlayeen Gantaalo ay tuurayeen Al-Shabaabka.

Duqeynta ayaa khasaaro kala duwan u geysatay maleeshiyaad ka tirsanaa al-Shabaab iyo dad shacab ah, inkastoo aan la xaqiijin Karin heerka uu gaarsiisan yahay Khasaaraha.

Geesta kale, Dowlada Mareykanka iyo Maleeshiyaadka al-Shabaab ayaan weli ka hadal Duqeynta iyo khasaaraha ka dhashay iyo waxa uu ahaa qasdiga duqeynta.

Caasimada Online

Xafiiska Muqdisho

Caasimada@live.com