Khasaaro intee la’eg ayaa ka dhashay dagaalka ciidamada Kenya & Al-shabaab ku dhexmaray Faxfax-dhuun?

[Deeq A.]

Muqdisho (Caasimada Online)-Warar kala duwan ayaa waxa uu kasoo baxayaa dagaal culus oo dhexmaray ciidamada Kenya iyo maleeshiyaadka al-Shabaab.

Dagaalka oo geystay khasaaro dhimasho iyo mid dhaawac ayaa ka dhacay degaanka Faxfax-dhuun oo ka tirsan Gobolka Gedo.

Dagaalkan ayaa yimid kadib markii xoogag ka tirsan maleeshiyada al-Shabaab ay weerar ku qaaden fariisin Ciidanka Kenya ay ku leeyihiin degaanka.

Dagaalka ayaa waxaa la sheegay in leysu adeegsaday Hubka noocyadiisa kala duwan, waxaana lasoo sheegayaa in al-Shabaab looga dilay Lix Maleeshiyo.

Ciidamada Kenya ayaa waxaa sidoo kale laga dilay Shan Askari, halka sidoo kale dagaalka looga dhaawacay 11 Askari oo xiliga weerarka ku guda jiray tamashleyn.

Goobjoogayaal ayaa sheegay in maleeshiyaadka weerarka soo qaaday ay wateen Gaadiid dagaal iyo hub xoogan, kuwaa oo marqura weerar ku galay saldhiga Ciidanka Kenya, intaasi kadibna uu xigay dagaal kulul oo labada dhinac dhexmaray.

Si kastaba ha ahaatee, Degaanka Faxfax-dhuun ayaa qiyaasti 70-KM u jira magaalada Baardheere oo sanaddii la soo dhaafay 2017 ay isaga baxeen Ciidamo ka tirsan kuwa Kenya.

Caasimada Online

Xafiiska Muqdisho

Caasimada@live.com