Al-Shabaab oo xilkii ka xayuubisay Horjoogihii u qaabilsanaa Gobolka Galgaduud

[Deeq A.]

Muqdisho (Caasimada Online)-Maleeshiyada al-Shabaab ayaa shaaca ka qaaday inay xil ka qaadis ku sameysay Gudoomiyihii ugu magacawnaa  Gobolka Galgaduud Sheekh Xasan Yacquub.

Maleeshiyada ayaa sheegtay in wadaadkaasi xilka looga xayuubiyay munaasabad ka dhacday Magaalada Ceelbuur.

Maleeshiyada ayaa sheegtay in Sheekh Xasan Yacquub uu xilkaas ku magacawnaa ku dhawaad 5 sano, hase ahaatee iminka laga qaaday gabi ahaan xilka uu hayay.

Munaasabada xil ka qaadista ayaa waxaa lagu sheegay in Sheekh Xasan Yacquub, lagu bedelay wadaad kale oo lagu magacaabo Sheekh C/laahi Abuu Khaalid oo ka tirsan isla maleeshiyada.

Maleeshiyada ayaan weli xil u magacabin Sheekh Xasan Yacquub, waxa uuna iminka kasii tirsanaan doonaa garabka shaqo la’aanta ah.

Waxaan la ogeyn sababta ka danbeysay in Hoggaanka maleeshiyada ay xilka ka qaado Sheekh Xasan Yacquub, mana jirto sabab rasmi ah oo lagu sheegay xil ka qaadistiisa.

Caasimada Online

Xafiiska Muqdisho

Caasimada@live.com