Ciidamo Boolis ah oo lagu arkayo qaar ka mid ah meelihii ay xasilinta faarujiyeen

[Deeq A.]

Muqdisho (Caasimadda Online) – Qaar kamid ah Fariisimihii ay ciidamada Xasilinta faarujiyeen saacadaha ka hor ayaa hadda waxaa lagu arkayaa ciidamo Boolis ah oo halkaas ku sugan.

Ciidamadaan ayaa waxaa lagu arkayo qeybo kamid ah meelihii ay Xasilinta faarujiyeen, waxaana kamid ah Isgoyska Howl-wadaag, Jid Mareexaanka, Geed Jaceyl iyo Shiikh Cali Suufi.

Weli waxaa jiro meelo badan oo haawanayo oo aysan imaan ciidamada Booliska Sida isgoyska Tarabuunka, Digfeer, Seybiyaano iyo qeybo ka mid ah woqooyiga Magaalada Muqdisho.

Ciidamada Xasilinta ayaa Maanta isaga tagay meelihii ay gawaarida ku baari jireen muddo 6 bilood ka badan, waxaana lasoo sheegayaa inuu jiro gadood ku saabsan xaquuq  la sheegay inaysan ciidamadaas helin.

Tan iyo markii ciidamadaas lasoo dhigay meelaha laga soo galo wadada Makka Al-Mukarama waxaa yaraaday qaraxyadii ka dhacayey Muqdisho gaar ahaan kuwa lagu soo xiri jiray gawaarida waaweyn.

Shalay ayey aheyd markii laba fariisimo oo ay ciidamadaas lahaayeen lala beegsaday qaraxo lagu soo xiray baabuurta Raaxada oo ay wadeen naftood hurayaan ka tirsan Ururka Al-Shabaab.

Saraakiil ka tirsan Dowladda Soomaaliya oo la hadlay Caasimadda Online ayaa sheegay in tallaabo sharciga waafaqsan laga qaadi doono Saraakiishii amartay inay ciidamadaas faarujiyaan koontarooladii ay gawaarida ku hubin jireen.

Caasimada Online

Xafiiska Muqdisho

Caasimada@live.com