Magaalada Muqdisho oo Maanta lagu soo Gaba-gabeeyay Tartanka Orodka Gaaban

[Deeq A.]

Muqdisho (PP) ─ Muqdisho waxaa maanta lagu soo gaba-gabeeyay Tartanka Maalinta Horumarinta Isboortiga Dunida iyo sidoo kale Maalinta Orodka gaaban ee Muqdishu Mini Marathone.

Tartanka ayaa waxaa ka qayb galayay 370 Orod yahan oo ka kala socda 17-ka Degmo ee Gobolka Banaadir, iyadoo Degmo waliba laga soo xulay 22 Ciyaartooy oo u badan kuwo da’ yar ah.

Tartanka oo kasoo billaawday Aargada KM 4 laguna soo gabagabeeyay KM O, ayaa waxaa kasoo qayb galay Wasiiradda Dhallinyarada iyo Ciyaaraha Soomaaliya, Khadiija maxamed Diiriye, Guddoomiyaha Gobolka Banaadir ahna Duqa Magaalada Muqdisho C/raxmaan Cumar Cusmaan (Yariisoow) , Guddoomiyaha sportiga Gobolka Banaadir Xasan Xaaji yabaroow iyo masuuliyiin kale.

Maalinta caalamaiga ah ee horumarinta Sportiga Adduunka, ahna Maalinta Orodka gaaban ee Muqdisho 6-da April ayaa waxaa sidoo kale kasoo qayb galay quburo ku xeel dheerayaal Orodka uu ka mid ahaa halyeey Cabdi Bile Cabdi iyo tababarayaal kale oo Taariikh ku leh Dalka Soomaaliya.

Orodka oo ahaa mid xiisa gaar ah leh ayaa waxaa kaalinta koobaad ka galay Xasan Iidoow Xasan oo ka tirsan Ciyaartooyda xulka Qaranka Horseed, halka kaalinta Labaadna uu galay C/salaan Maxamed.

Markii uu soo gabagaboobay Ororka ayaa waxaa halkaasi ka hadashay wasiirka wasaaradda Sportiga iyo dhallinyarada Soomaaliyeed Khadiijo Maxamed Diiriye, waxanay sheegtay inay xustay inay Sanadkan ku guuleysteen soo bandhigidda munaasabadda Caalamiga ee horumarinta Sportiga Adduunka oo huwan munaasabad Qarameedda 6 April oo ah Muqdisho Mini Marathon.

Wasiirad Khadiijo ayaa sheegtay inay Soomaaliya ka gaadhay xagga Sportiga horumar la taaban karo, iyadoo tilmaantay in qabashada Labadan munaasabadood muddo laga soo shaqeeyay hirgelintooda fikirna lagu bixiyay, waxanay tallaabadani ugu mahad celisay Guddoomiyaha Gobolka iyo madaxda xiriirka Olympikada Soomaaliyeed.

“Waxaa hirgelinta munaasabaddan suurto geliyay Guddoomiyaha Gobolka Banaadir ahna duqa Muqdisho, wasaaradda hindisaheeda uma suurto galeen haddaydaan Gacan na siin, sidoo kale waxaan u mahad celinayaa xiriirka Olympikada Soomaaliya oo kaalin ka qaatan” ayay tiri wasiiraddu.

Khadiijo Diiriye ayaa sidoo kale sheegtay inay isla Maanta Daah furtay Mashruuc lagu horumarinayo nabadda sportiga iyo is dhex galka bulshada soomaaliyeed, kaasoo ay qayb ka yihiin maamul goboleedyada Dalka ka jira.

Wasiiradda ayaa dhanka kale Dhallinyarada Soomaaliyeed ku boorrisay inay la mid noqdaan halyeyga Cabdi Bile Cabdi oo ah Nin kii ugu horreeyay ee isaga oo Magac Soomaaliyeed ku cayaaraya Billado u soo hooyay Qarankiisa.

Waxay sidoo kale sheegtay in dhammaan ka qayb galayaasha Maalinta Orodka gaaban ee Muqdisho la guddoonsiin doono Shaqaado Sharaf lagu caddeeynayo tartankii ay ka qayb galeen.

Guddoomiyaha Gobolka Banaadir Eng; C/raxmaan Cumar Cusmaan ayaa sheegay in Maanta ay farxad weyn u tahay in tartanka uu ka dhaco Muqdisho, wuxuuna bogaadiyay doorkii lixaadka lahaa ee ay wasaaradda Sportiga ka qaadatay hir gelinta tartankan, wuxuuna si aad ah ugu mahad celiyay halyeeyga Orodka Soomaaliyeed cabdi Bile Cabdi iyo Dhallin yaradii ka qayb qaadatay Orodka gaar ahaa Carruurtii aadka u da’da yarayd ee tartamaysay.

Eng. Yariisoow ayaa sheegay inay tallaabadani tahay farriin nabadeed, isagoo xusay inay Muqdisho la mid noqon doonto caasimadaha Adduunka haddii dedaalladan oo kale la sii wado lana dhiirri geliyo.

Orodyahanka Cabdi Bile ayaa aad ugu dheeraaday Taariikhda Marathone-ka Soomaaliya, doorkii uu kasoo qaatay, wuxuuna ammaanay niyadda ay u hayaan Dhallinta cusub inay ka mid noqdaan Orod yahannada Caalamka, kuwaasoo sida uu sheegay u haya Orodka niyad iyo han fiican, wuxuuna ugu mahad celiyay waalidkii u oggolaaday iyo Macallimiintii ku soo barbaarisay.

Ugu dambayntii waxaa halkaas Billado isugu jira Dahab, Qalin iyo Maar lagu kala guddoonsiiyay Saddexdii Orod yahan ee kaalimaha hore ka galay tartanka, waxaana Billadda Dahabka hantiyay Cali Iidoow Xasan oo 19 jir ah una dheela xulka Qaranka Horseed halka kaalinta Labaadna uu galay C/Salaan Maxamed.

PUNTLAND POST

The post Magaalada Muqdisho oo Maanta lagu soo Gaba-gabeeyay Tartanka Orodka Gaaban appeared first on Puntland Post.