Maamulka Galmudug oo u diyaar garoobaya dagaallo ka dhan ah Al-Shabaab

[Deeq A.]

Dhuusamareeb (Caasimada Online) – Ciidanka maamul-goboleedka Galmudug ayaa qaadi doona howlgallo ka dhan Maleeshiyada Al-Shabaab ee haatan ku sugan degaanno ka tirsan Galmudug.

Madaxwaynaha dawlad-goboleedka Galmudug Axmed Ducaale Geelle Xaaf ayaa sheegay inuu xoogeystay qorshaha ay Galmudug kula dagaalameyso Al-Shabaab xilli uu ka hadlayey munaasabad lagu mideynayey Ciidamada Galmudug oo horay u kala ahaa Ahlu Sunna iyo Galmudug.

Mudane Axmed Ducaale Geelle Xaaf ayaa daaha ka qaaday in howgalka ay Galmudug dhulkeeda uga tirtireyso Al-Shabaab ay kaalin weyn ka qaadan doonaan Ciidanka shalay oo Jimco aheyd la mideeyey.

Mudane Axmed Ducaale Geelle Xaaf, madaxweynaha Galmudug ayaa  ugu baaqay shacabka Galmudug inay ciidamada ku garab siiyaan hawlgalka, si maleeshiyada Al-Shabaab looga dulqaado dhibaatada ay ku hayaan dadka degan Bariga gobolka Galgaduud iyo deegaano aan badnayn oo hoos taga degmada Xarardheere ee gobolka Mudug.

Horay waxaa loo mideeyey Baarlamaanka Galmudug, hadana waxaa lagu guuleystay midnimada Ciidankeeda oo horay u kala joogay magaalooyinka Cadaado iyo Dhuusamareeb, taasoo sahli karta inay qaadaan howgallada ka dhanka ah Al-shabaab, sida uu aaminsan yahay Madaxweyne Axmed Ducaale Geelle Xaaf.

Caasimada Online

Xafiiska Dhuusamareeb

Caasimada@live.com