Khasaaro kala duwan oo ka dhashay Qarax lala eegtay ciidamo ka tirsan maamulka Puntland

[Deeq A.]

Garoowe (Caasimada Online)-Warar dheerad ah ayaa waxa uu kasoo baxayaa Qarax maanta lala eegtay gaari ay la socdeen ciidamo ka tirsan maamulka Puntland.

Qaraxa oo ka dhashay khasaaro kala duwan ayaa waxaa ciidamada lagula eegtay wadada gasha Tuulada Galgala oo ay isticmaalaan Ciidamada Puntland.

Inta la xaqiijiyay Qaraxa ayaa waxaa ku dhintay illaa  Seddex Askari oo midi uu galabta u dhintay dhaawac xoogan oo soo gaaray, halka dhaawacyada ka dhashay Qaraxa ay gaarayaan ilaa afar Askari.

Ciidamada Qaraxa lala eegtay ayaa la xaqiijiyay inay kusii jeeden Saldhig ay ku lahaayen duleedka Tuulada Galgala, waxaana halkaa markii danbe gaaray ciidamo gurmad ah oo soo daabulay Meydadka iyo dhaawacyada.

Maleeshiyada al-Shabaab ayaa dhawaan Qarax kaa lamid ah ku dishay Saraakiil dhowr ah oo ka kala tirsanaa ciidamada Militeriga iyo Booliska Puntland.

Dhinaca kale Askari ka tirsanaa Ciidamada Booliska Gobolka Bari ayaa toogasho lagu dilay xilli uu marayay meel ku dhow suuqa degmada Boosaaso ee Gobolka Bari, waxa kaloo goobta lagu dilay Askariga laga helay nin shacab ah oo dhaawacan.

Caasimada Online

Xafiiska Garoowe

Caasimada@liv.com

The post Khasaaro kala duwan oo ka dhashay Qarax lala eegtay ciidamo ka tirsan maamulka Puntland appeared first on Caasimada Online.