Maxay tahay sababta Madaxweyne Farmaajo ugu hoyday Wasaaradda Gaashaandhigga?

[Deeq A.]

Muqdisho (Caasimadda Online) – Madaxweynaha Soomaaliya Maxamed Cabdullaahi Farmaajo ayaa ku hoyday caawa xarunta Wasaaradda Gaashaandhigga Soomaaliya, waana markii ugu horreysay burburkii kaddib uu Madaxweyne Soomaaliyeed ku hoydo xaruntaas.

Sababta uu Madaxweynuhu ugu hoyday Wasaaradda Gaashaandhigga ayaa wararku sheegayaan inuu kulamo joogto ah la yeesho Saraakiisha iyo Hoggaamada Ciidanka Xoogga si la iskugu dubba rido Ciidanka Qaranka oo u diyaar garoobay inay Alshabaab dalka ka xoreeyaan.

Wasiirka Gaashaandhigga, Taliyayaasha Booliska iyo Nabadsugidda, Abaanduulaha Ciidamada Xoogga iyo Hoggaamida Ciidanka Xoogga ayuu Madaxweyne Farmaajo kulamo guud iyo kuwa gaar gaar ah la lahaa maanta ilaa caawa, si loo dhammeystiro abaabulka dagaalka ay ciidamada Qaranku kaga sifeyn doonaan Alshabaab.

Waa markii shanaad uu Madaxweyne Farmaajo ku shaqeeyo Wasaaradda Gaashaandhigga, waana markii u horreysay uu u hoydo, taasina waxay tilmaamaysaa in ay Madaxweynaha ka go’antahay inuu dalka ka xoreeyo aragagaxisada Alshabaab iyo in Soomaaliya laga dhaliyo nabad iyo xasillooni.

Caasimada Online
Xafiiska Muqdisho
Caasimada@live.com

The post Maxay tahay sababta Madaxweyne Farmaajo ugu hoyday Wasaaradda Gaashaandhigga? appeared first on Caasimada Online.