Waxgaradka Buuhoodle oo dadaal xooggan ugu jira joojinta colaadda Gocondhaale iyo Horufadhi.

[Deeq A.]

Guddi ka kooban Cuqaal,Nabadoonno,iyo Waxgarad oo ka baxay magaalada Buuhoodle ee xarunta gobolka Cayn ayaa duhurnimadii maanta ku guulaystay in ay joojiyaan dagaal kooban mar kale ka qarxay degaannadii ay shalay dirirtu ku dhexmartay labada beelood.

Dagaalkii shalay ayaa wararku sheegayan in ay ku dhinteen saddex ruux oo labada dhinacba ah,islamarkaana ay ku dhaawacmeen laba ruux,sida ay xaqiijiyeen dadka degaannada Gocondhaale iyo Horufadhi ee lagu dagaallamay oo PUNTLAND POST xiriir la samaysay.

Dhinaca kale dagaal kooban ayaa maanta halkaasi ka dhacay,kaasoo aan weli si faahfaahsan xog looga hayn,inkastoo dadka degaanku ay soo weriyeen in mid kamid ah ragga hogaaminya malayshiya-beeleedka uu dhaawac ka culus soo gaaray.

Nabadoonnada iyo Waxgaradka Puntland ee ku sugan gobolka Cayn ayaa sheegaya in uu socdo dadaal ballaaran oo lagu doonayo in heshiis nabadeed looga dhex dhaliyo labada beelood ee ku dagaallamay degaannada Gocondhaale iyo Horufadhi oo ka tirsan gobolka Cayn ee Puntland.

PUNTLAND POST

The post Waxgaradka Buuhoodle oo dadaal xooggan ugu jira joojinta colaadda Gocondhaale iyo Horufadhi. appeared first on Puntland Post.