Tirro al-Shabaab ah oo ka baxsadey Xabsi lagu hayey oo ku yaalay magaalada Garoowe

[Deeq A.]

Boosaaso (Caasimada Online)-Wararka naga soo gaaraya magaalada Garowe ee xarunta maamulka Puntland ayaa sheegaya in 13 ka tirsanaa Carruurtii al-Shabaab ee lagu qabtey dagaaladii ka dhacay Puntland ay ka baxsadeen xabsiga.

Carruurtaan ka tirsaneyd al-Shabaab ee xabsiga ka baxsatay ayaa lagu kala qabtay deegaanada Suuj, Garmaal iyo weliba Garacad.

Carruurtaan baxsatay ayaa la sheegay in xilliga la qabanaayey ay dagaalka kula jireen ciidamada difaaca maamulka Puntland, waxaana Xabsiga loogu samaynayey wax loogu yeeray dhaqan-calin.

Wararku waxay intaas ku darayaan in mid kamid ah Carruurta dib loo qabtey, halka 12 kii kale aan gacan lagu dhigin lamana oga in ay ku jiraan gudaha magaalada Garoowe iyo in ay ka baxsadeen.

Sidoo kale, Sarkaal u hadlay Ciidanka Puntland ayaa wuxuu sheegay inuusan kala cadayn karin in carruurtaas Shabaabka ahaa si ula kac ah ooda looga qaaday ama inay iyagu baxsadeen, waxaase uu cadeeyay inay hayaan hal qof oo looga shakisan yahay inuu ka mid ahaa Maxaabiista oo ciidamadu soo qabteen.

Xaruntan ay ku xareysanaayeen ayaa waxaa amnigeeda u xilsaaranaa Ciidanka Asluubta Puntland, lamana oga sababaha keenay baxsashadooda.

Dhinaca kale, al-Shabaab-ka ka baxsadey halkii  amnigooda lagu sugayey ayaa weji gabax ku ah maamulka Puntland waxaana la is weydiinayaa khatarta ay keeni karto arrintan.

Caasimada Online

Xafiiska Boosaaso

Caasimada@live.com

The post Tirro al-Shabaab ah oo ka baxsadey Xabsi lagu hayey oo ku yaalay magaalada Garoowe appeared first on Caasimada Online.