(SAWIRRO) Dowladda Puntland oo cudurka Jadeecada ka tallaalaysa carruur ka badan hal milyan

[Deeq A.]

Garowe (Puntlandi)  Ololaha Tallaalka Cudurka Jadeecada iyo diiwaan galinta dhalashada carruurta ayaa maanta oo isnin ah ka bilowday magaalada Garowe ee caasimadda Puntland.

Ololahan oo ah mid ka hortag ah ayaa la gaarsiindoonaa in ka badan hal milyan oo carruur ah oo ku nool dhammaan gobolada Puntland, waxaana carruurta la talaalayo u dhexeeyaan 6 bilood iyo toban sanno jir.

Barnaamijkaan ayaa daahfurkiisa waxaa ka qeyb galay madaxda wasaaradda caafimaadka iyo marti sharaf kale oo badan, waxaana goobta xaflada furtaanka lagusoo bandhigay ruwaayad iyo suugaan ka turjumayay muhiimada tallaalku leeyahay iyo sida la doonayo in looga faa’idaysto.

Wasiirka caafimaadka dowladda Puntland. Dr, Cabdinaasir Cuuke, ayaa sheegay in fulinta Tallaalkaan ay ka qeyb qaadandoonaan dad gaaraya 7000, oo ah kooxaha caafimaadka, 500 korjoogtayaal ah iyo 2000 oo gaadiid ah.
Dr. Cuuke wuxuu sheegay 6 bilood ee ugu dambeysay inay diiwaan galiyeen 1,805 kiis oo cudurkaan ah.

Wasiirka wuxuu ugu baaqay waalidiintu inay ilmahooda tallaalaan ayna ogaadaan in aduun iyo aakhiro lagula xisaabtamidoono haddii carruurtooda u geeriyoodaan tallaalka lagu badbaadinayo ubadkooda.

Agaasimaha arrimaha gudaha Puntland, Maxamed Cali Nuur (Jubba), oo ka hadlayay daahfurka diiwaangalin dhalashada carruurta, ayaa sheegay muhiimada laga leeyahay arrintaan inay tahay, in dowladdu ay ogaato tirakoobka guud ee carruurta soo dhashay lanasiiyo xuquuqdooda dhalasho.

Puntlandi.com