Wasiir Yariisow oo sheegay in Nabaddoon xalay lagu dilay Wanllaweyn uu ahaa Al-shabab

[Deeq A.]

Muqdisho (Caasimadda Online) – Wasiirka Warfaafinta Xukuumadda Soomaaliya C/Raxmaan Cumar Cismaan Yariisow ayaa sheegay in Ciidamada gaarka ah ee Dowladda Soomaaliya ay xalay Degmada Wanllaweyn ku dileen sarkaal dhinaca Maaliyadda u qaabilsanaa Al-shabaab.

Wasiirka ayaa Bartiisa Facebook ku qoray in Nabaddoon Macallin Jeelle uu ka mid ahaa AL-shbaaab gaar ahaan qeybta Maaliyadda.

Ehellada Nabaddoonka Xalay lagu dilay Wanllaweyn ayaa u sheegay Idaacadda Mustaqbal in Ciidamada dowladda ay weerar ku qaadeen guri uu ka degganaa Magaalada Wanllaweyn islamarkaana la toogtay.

Odayaasha uu nabaddoonka u ahaa Macallin Jeelle ayaa u sheegay Idaacadda Mustaqbal in Meydka Nabaddoonka la geeyay Garoonka Balli-doogle oo ah saldhigga Ciidamada xalay dilay,halkaasna ay Odayaasha iyo saraakiisha saldhigga ku wadahadlayaan.

Abaan duulaha Ciidanka Balli-Doogle Korneyl C/Salaan ayaa sheegay in uusan isaga joogin Saldhigga Xilliga weerarkaasi la qaadayay hayeeshee uu Afgooye ka baxay kuna sii socdo Saldhigga Balli-doogle oo ay ku suganyihiin Saraakiisha Ciidamada weerarka qaaday iyo odayaasha uu ka soo jeedo  Nabaddoonka la dilay.

Caasimada Online
Xafiiska Muqdisho
Caasimada Online

The post Wasiir Yariisow oo sheegay in Nabaddoon xalay lagu dilay Wanllaweyn uu ahaa Al-shabab appeared first on Caasimada Online.