Al-Shabaab oo dilay Saraakiil uu kamid yahay Wiil uu dhalay Sheekh Mukhtaar Roobow

[Deeq A.]

Muqdisho (Caasimada Online)-War goordhow naga soo gaaraya Gobolka Bakool ayaa sheegaya in halkaa uu ka dhacay dagaal xoogan oo u dhexeeyay ciidamada dowlada oo garab ka helaaya Xoogaga Mukhtaar Roobow iyo maleeshiyada al-Shabaab oo dhinacah.

Dagaalka oo ahaa mid culus ayaa ka dhacay degaanka Abal oo aan sidaa uga sii fogeyn magaalada Xudur ee xarunta Gobolka Bakool.

Dagaalka ayaa ka danbeeyay kadib markii ciidamada dowlada iyo Xoogaga Mukhtaar Roobow ay weerar gaadmo ah ku qaaden fariisimo ku yaala deegaanka Abal oo ay ku sugnaayen maleeshiyaadka al-Shabaab.

Dagaalka ayaa waxaa wakhti danbe ku biiray ciidamada Ethiopia ee ka hoos shaqeeya maamulka Koonfur Galbeed, waxaana lasoo sheegayaa in lagu jabiyay maleeshiyada al-Shabaab.

Sidoo kale, warar ay baahiyeen maleeshiyaadka al-Shabaab ayaa waxaa lagu sheegay in dagaalka ay ku dileen Saraakiil oo uu ka mid yahay C/laahi Mukhtaar Rooboow oo ahaa wiil uu dhalay Sheekh Mukhtaar Roobow ‘’Abuu Mansuur’’

Maleeshiyada ayaa sidoo kale, sheegtay in isla dagaalka ay ku dileen  Taliyihii hogaaminaayay ciidamada khaaska ah ee Abuu Mansuur oo magaciisa lagu soo gaabiyay Manuur Ganeey.

Shabaabka waxay kaloo sheegeen in ay si buuxda ula wareegeen degaanadii maanta ay ka dhaceen dagaalada, waxaanan jirin ilo madax banaan oo xaqiijinaya sida saxda ee ay wax u dhaceen.

Dhinaca kale, dilka wiilka Mukhtaar Roobow iyo Taliyaha ciidamada khaaska ah, ayaa waxaan weli ka hadal Maamulka Koonfur Galbeed iyo Garabka daacada u ah Roobow.

Caasimada Online

Xafiiska Muqdisho

Caasimada@live.com

The post Al-Shabaab oo dilay Saraakiil uu kamid yahay Wiil uu dhalay Sheekh Mukhtaar Roobow appeared first on Caasimada Online.