Akhriso: Dib u milicsiga nuxurka guud ee warbixinta ay soo gudbiyeen Guddiga gacanta ku haya baaritaanka kiiska Qalbi Dhagax

[Deeq A.]

Muqdisho (Caasimada Online)-Sida aan warbixinadeenii hore ku sheegnay Guddiga Baarlaamaniga ah ee Golaha shacabka ayaa maanta soo gudbiyay warbixin ku saabsan kiiska Cabdi Kariim Sheekh Muuse (Qalbi dhagax) oo waayadani laga sugaayay.

Warbixinta ay soo gudbiyeen Guddiga ayaa taabaneysay dhinacyo badan waxaana kamid ahaa qodobo qeexaaya halka uu ku fooraro dhiibitaanka Qalbi Dhagax iyo sababta ka danbeysay.

MEEQO QODOB OO MUHIIM AH AYEY KA KOOBNEYD WRBIXINTA GUDDIGA:

• Ka-baaraan-degidda qaraarka Golaha Wasiirada ee 6dii Sebtember ee ku saabsanaa arrinkan.
• Qodobada Dastuuriga ah, Heshiisyada Caalamiga ah iyo Shuruucda dalka u dagsan ee ku saabsan dhiibista Qalbi Dhagax.
• Kabaaraan-degidda iyo qiimaynta Qadiyadda.
• Go’aamo, Toosin iyo Tala bixin

Gudigu waxa ay soo bandhigeen in ay waraysiyo kala duwan la yeesheen Masuuliyiinta sida dhaw xiriirka ula lahaa kiiskan.

MAS’UULIYIINTA WAREYSIGA AY LAYEESHEEN WAXAA KAMID AHAA : 

1-Wasiirka Wasaaradda Cadaaladda, Taariikhda 21 October 2017.

2-Agaasimaha Hay’adda Sirdoonka iyo Nabad Sugidda 22kii October 2017.

3-Wasiirka Wasaaradda Amniga, Taariikhda 22 October 2017

4-Agaasimaha Hay’adda Socdaalka iyo Jinsiyadaha, Taariikhda 23 October 2017

5-Taliyaha Ciidanka Booliska iyo Madaxa Hay’adda Dembi-baarista Ciidanka Booliska Taariikh 23 October 2017.

KA BAARAANDEGIDDA IYO QIIMAYNTA QADIYADDA:

Gudiga ayaa warbixintooda ku soo bandhigay in arrintaan ay xirii la leedahay siyaasadda iyo amniga qaranka maadaama Soomaaliya ay ku jirto marxalad dib u-soo nooleynta Qarannimada Soomaaliya, dowladdana ay waajib ku tahay in ay mudnnaanta koowaad siiso Sugidda amniga qaranka iyada oo  guddigu hoosta ka xariiqeen siyaasadda Jahmuuriyadda Federaalka Soomaaliya ee ku salaysan nabad ku wada noolaanshaha wadamada Gobolka iyo guud ahaan caalamka.

QALBI DHAGAX IYO KOOXDA ONLF 

Guddigu waxa ay bayaamiyeen in dhiibsita Qalbi Dhagax aan hab sharci ah loo marin, lagana tala gelin Hay’daha Garsoorka, iyadoo isla markaas ay maareeysay Hay’adda Sirdoonka iyo Nabad Sugiida Qaranka oo kaliya, laguna saleeyey go’aan ku dhisan xog aan sugnayn oo hay’addu ay siisay Madaxda Qaranka.

Sidoo kale, Guddigu waxa ay sheegeen in Jabhadda ONLF loo aqoonsan in ay tahay urur argagixiso  balse sidoo kalena la tix galiyo siyaasadda dalka ee ku salaysan in aan aqoonsi iyo gabaad  midna la siin ururada hubaysan ee ka soo horjeeda nabadgaliyada iyo jiritaanka dalka iyo wadamada deriska ah iyo guud ahaan dunida inteeda kale.

GO’AANO IYO TOOSIN

Guddiga Baarlamaaniga ah ee loo xilsaaray baaritaanka waxa ay Xukuumadda fareen in ay dib u raac ku samayso Heshiisyadii hore ee dalka galay iyo in taxadar dheeraad ah ay muujiso markasta oo ay maareeynayso hawlaha xasaasiga ah iyada oo ku salaynaysa xog sugan oo waafaqsan farriimaha Dastuurka iyo Shuruucda dalka.

Ugu dambayntii Guddigu waxa ay ugu baaqeen Golaha Shacabka in laga fogaado arrin kasta oo keeni karta xasilooni darro siyaasadeed ama abuuri karta khal khal amni, loona baahanyahay in si wada jir ah looga wada shaqeeyo danta Qaranka.

Caasimada Online

Xafiiska Muqdisho

Caasimada@live.com