Ambassador Mohamed Ali Ameriko a true patriot

[oba hiloowlow]

Safaaradda Soomaliya ee dalka Kenya ayaa sheegtay in dowlada Kenya ay soo garsiisay raali gelin ku aadan dad ay ciidamadeedu ku laayeen gobolka Jubbada hoose.

 

Danjiraha Soomaaliya ee dalka Kenya mudane Maxamed cali Ameerico ayaa Radio Muqdisho u sheegay in warqad ashtako ah uu u diray dowladda Kenya, taas oo ku aadaneyd muwaadiniin Soomaali ah oo ciidamada Kenya ay ku dileen deegaanka Jannaay Cabdalle ee gobolka Jubbada Hoose.

 

Isagoo hadalkiisa sii wata ayuu Danjiruhu intaa ku daray in dowladda Kenya ay ka soo jawaabtay ashtakada uu u gudbiyay, wuxuuna xusay in ay raaligelin ka bixisay arrintaasi.

 

‘’in ksatoo dowladda Kenya ay ciidamadeedu taageerayaan ciidamadeenna XDS ee howlgallada ka wada gobolka Jubbada hoose, haddana kama ogolaaneyno in ay xasuuqaan muwaadiniinta Soomaaliyeed, kamana haridoono ilaa ay Kenya bixiso magta dadka ay ku dileen Jannaay Cabdalle’’ ayuu yiri Danjire Maxamed Cali Ameerico.

 

Hadalka Danjiraha ayaa yimid xilli dhawaan askar ka tirsan ciidamada Kenya ay Tuulada Jannay Cabdalla ee G/J/Hoose ku dileen muwaadiniin Soomaali ah oo ka mid ahaa dadka ku nool Tuuladaasi.