Baarlamaan Somaliland Oo Madaxwayne Siilaanyo Duuduub Ugu Ansixiyey Soo Jeedintii Ay Marxuum Cigaal

[Carafaat]

Baarlamaan Somaliland Oo Madaxwayne Siilaanyo Duuduub Ugu Ansixiyey Soo Jeedintii Ay Marxuum Cigaal Ka Diideen 1994-kii

 

“Anigu ina Cigaal ahaan Soomaliya ma necbi waayo Raysal-wasaare ayaan ka soo noqday, laakiin maanta waa la kala daneystay” Khudbadii Marxuum Cigaal ee baarlamaanka hortiisa

 

Waa qodob lagu daro Xeerkii lagu xakamaynayey in laga qayb galo shirarka Somaliya, qodobkaas oo ah in Xukuumaddu ka qayb gasho shirkii loo arko in dani ku jirto” Cirro

 

 

“Haddii hawlihii guduhuba isku-kaa raacsanayn, ictiraafka dibada laga doonayaa maxaa faa’iido ah oo uu keenayaa” su’aal la waydiiyey Marxuum Cigaal

Hargeysa(Waaheen) – Mudanayaasha labada aqal ee baarlamaanka Somaliland ayaa shalay cod aqlabiyad ah ku meel-mariyey in xukuumadda Madaxwayne Axmed Maxamed Maxamuud (Siilaanyo) ka qayb-gasho shirka kooxaha Soomaliya loogu qabanayo Magaaladda London dabayaaqada bishan.

 

Fadhigan labadan aqal ee baarlamaanka Somaliland ku ansixiyeen in xukuumaddu si kalsooni leh uga qayb-gasho shirka London oo ahaa mid ka dhashay kulan qaddo- ahaa oo Madaxwayne Siilaanyo doraad Mudanayaasha labada golle ugu sameeyay huteelka Maansoor isla-markaana ugu soo bandhigay ajandayaasha shirka London oo qaybo ka mid ah dhawaan dawlada Britain u soo gudbisay, ayaa u hirgalay sidii Madaxwaynuhu u fuliyey.

 

Fadhigan labadan golle baarlamaan ee Somaliland ayaa oo uu shir-guddoominayey Guddoomiyaha golaha wakiilada Somaliland Md Cabdiraxmaan Maxamed Cabdilaahi (Cirro) ayaa sidoo kale waxa lagu ansixiyey qodob dheeraad ah oo lagu daray xeerkii mabnuucayey in Somaliland iyo siyaasiyiinteeduba ay ka qayb-galaan shirarka kooxaha Soomaliya loo qabanayo, kaasi oo nasaxay qodobadii hore ugu jiray xeerkaasi, isaga oo xukuumadda u fasaxay inay ka qayb-gasho shirka London.

 

Qodobadan lagu meel-mariyey fadhigii labada golle ee baarlamaanka Somaliland, ayaa waxa cod ku ansixiyey 101 xildhibaan oo ka mid ahaa 109 mudane oo fadhigaasi fadhiyey, waxaana diiday 3 Mudane, 4-na way ka aamuseen, halka Guddoomiyuhuna aanu ka codeynin.

 

Mudanayaasha Golaha Wakiiladda Somaliland ayaa fadhi-wada jir ah oo ay maanta cod aqlabiyada ahb ku Ansixiyay in Xukuumadda lagu taageero in laga qayb galo shirka Somaliya loogu qabanayo Dalka Ingiriiska iyo in kaabis iyo wax ka bedel lagu sameeyo Xeer uu Golahaasi hore u ansixiyay oo xakamaynayay in Dawlada Somaliland ka qayb gasho shir lagaga hadlayo arrimaha Somaliya.

 

Fadhigan maanta ee labada Gole ee Baarlamanka Somaliland oo uu Shir-guddoominayay Guddoomiyaha Golaha Wakiiladda C/raxmaan Maxamed C/lahi Cirro, kana soo xaadireen 109 Mudane oo ka mid ah 164 mudane ee Guurtida iyo Wakiiladda Somaliland , ka hor intii aan cod loo qaadin labadaasi qodob, waxa khudbad ka hor jeediyay Wasiirka arrimaha dibada Dr. Maxamed C/lahi Cumar, kaasoo ka waramay faa’idada Somaliland ugu jirta inay shirkaasi ka qayb gasho.

 

Guddoomiye Cabdiraxmaan Cirro, ka hor inta aan labada qodob la meel-marin kalmado kooban u jeediyay mudanayaasha baarlamaanka waxa uu yidhi “laba arimood ayaanu mudanayaasha u soo jeedinaynaa midi waxa weeye waxa ina horyaala go’aan goluhu gaadhay mar hore, waxaana daruuri noqotay in inagoo ilaashanayna qaranimadeena inay danaheena kale ilaashano, markaa qodobka hore waxa weeye in qodob lagu soo daro Xeerkii lagu xakamaynayey in laga qayb galo shirarka Somaliya, qodobkaas oo ah in Xukuumaddu ka qayb gasho oo loo arko in dani ku jirto, kana hor imanaynin jiritaanka qaranimada iyo Dastuurka Somaliland, qodobka labaadna waxa weeye maadaama Xukuumaddu codsatay in labada Gole ku taageeraan in shirka London laga qayb galo in labada golle ay ku taageeraan”

 

Ka sakow ansixinta in xukuumadda Madaxwayne Axmed Siilaanyo ka qayb-gashii shirka London,waxa isaguna fadhiga labada golle hadal ka soo jeediyay wasiirka wasaaradda arimaha dibada Dr Maxamed Maxamed Cabdilaahi, waxaanu tilmaamay in qayb-galka shirka London aanu waxba u dhimayn qadiyada madax-banaanida iyo jiritaanka Somaliland, isaga oo tilmaamay inay shirkaasi ku soo bandhigi doonaan sida Somaliland beesha caalamka uga naawilayso inay ictiraaf caalami ah ka hesho.

 

Fadhigan labada golle ee baarlamaanka Somaliland ku ansixiyeen in shirka London laga qayb-gallo, waxa jiray Mudanayaal golaha wakiilada ka mid ah oo ka baxay ka hor inta aan loo codeyn xildhibaan Maxamed Faarax Qabile oo meel-marinta ka qayb-galka shirka London u arkayey in laga ansixinayo in ceel dheer lagu ridayo jiritaanka Somaliland, maadaama oo aan xog rasmi ah laga hayn maxsuulka shirka London.

 

Dhinaca kale, Mudanayaasha labada golle ee baarlamaanka Somaliland ayaa indhaha ka qarsaday inaan wax ka bedal lagu samayn xeerkii muwaadiniinta Somaliland u diidayey inay ka qayb-galaan shirarka kooxaha Soomaliya loo qabanayo, kaasi oo baarlamaanku hore u meel mariyeen, ka dib markii ay si isdaba joog ah u soo kordheen shirarka beesha caalamku Soomaliya u qabanayso, kuwaasi wakhtigii Alle ha u naxariistee Madaxwayne Maxamed Ibraahim Cigaal talada dalka gacanta ku hayey shaki ka dhex abuuray xukuumaddiisii iyo golaha wakiilada, kaasi oo sababey in baarlamaanku hor-joogsadaan in Marxuum Cigaal uu safar ku taggo Magaaladda Qaahira 1994-kii oo uu ka socday shir loo qabtay Soomaliya, iyadda oo baarlamaanka Marxuum Cigaal ka diiday uu ka mid ahaa Madaxwayne Axmed Maxamed Maxamuud (Siilaanyo).

 

Marxuum Cigaal ayaa khudbad uu ka jeediyey fadhigaa wada jirka ah ee baarlamaanku kaga diideen inuu shirka Qaahira taggo ayaa waxa ka mid ahaa “Anigu ina Cigaal ahaan Soomaliya ma necbi waayo Raysal-wasaare ayaan ka soo noqday, laakiin maanta waa la kala daneystay, sideedabana dibad u baxa dhib aan laga soo kaban Karin ayay keeni kartaa, faa’iido waynina way ka iman kartaa, waa inaad ku tallo-gal aan ka yeelataan, haddii aan taggo waxaan la tagayaa Masar oo ah meesha kabta feygeeda inagaga taagan inay inagala hadhaan Somaliya ma kala go’in karto, waxa kale oo ka mid ah ku tallo-galkayga in albaabadan Carbeed ee inaga xidhmay inaga furmaan”

 

Marxuum Cigaal oo wakhtigaa u diyaar-garoobayey safar uu ku taggo dalka Masar ayaa sidoo kale soo qaaday “Boorama way nagii ku soo dhisnay golayaasha, waa run waa la inoo soo doortay in dalkan ictiraaf u raadino, dadkana la walaaleeyo, muddo dheer hawluhu si fiican ayay inoogu socdeen, in muddo ka soo wareegtay shacabka iyo madaxdu isku mid ayay ahaayeen, dhawaaqii Burco siyaasadii jirtay waxaad moodaa inay wax ku soo biireen oo qaranimadii shaki la galiyey, lana xalaashaday oo waliba inaga shaki la ina galiyey, New-york-na waan tagayaa, waxaanan lahaa waar kursiga (Qaramada midoobay) aan ku fadhiisano, ragna waxay lahaayeen wax cusub aynu doonayno oo nimankaa Soomaliya waxay leeyihiin inaga daaya, markaa aniga haddii arintaasi la igaga shakiyey waxa waajib ahayd in maxkamada la I saaro, waayo waa khiyaamo qaran, haddii labada golle goostaan Soomali-weyn anigu idin raaci mayo”

 

Marxuum Cigaal waxa kale oo uu khudbadiisaasi ku sheegay “Ictiraaf dibada ma jiro ee waxa uu ku xidhan yahay in xukuumaddu raadiso”

 

Marxuum Cigaal oo maalintaa labada Mudanayaasha labada aqal ee baarlamaanka Somaliland waydiiyeen su’aalo door ah oo la xidhiidha xaaladii wakhtigaa ee Somaliland, ayaa su’aalihii la waydiiyey waxa ka mid ahaa “Waxay umaddu ku jihaysan tahay in ictiraafka dibada laga keenayo, imika socdaalkaagii saddexaad ayaad qorshaysatay, haddii hawlihii guduhuba isku-kaa raacsanayn, ictiraafka dibada laga doonayaa maxaa faa’iido ah oo uu keenayaa”?