Somaliland Information Minister Haabsade meets Garaad Jamac Garaad Cali in Saaxdheer

[Xaaji Xunjuf]

Wasiir Xaabsade oo shalay u soo Galab-caraabay Hargeysa iyo Garaad jaamac oo u Kolanyaysytay Taleex

Nuxurka Kulan ay al-baabadu u xidhanyihiin oo ay shalay ku wada yeesheen tuulada Saax-dheer ee Gobolka Sool

Hargeysa(Waaheen)-Wasiirka Warfaafinta Somaliland Axmed Cabdi Xaabsade ayaa la sheegay inuu maanta kulan alaabadu u xidhanyihiin kula yeeshay Magaalada Saax-dheer oo ilaa 70 KM Koonfur kaga beegan Laascaanood Garaadka Guud ee Beelaha Sool iyo BuhoodleGaraad Jaamac Garaad Cali oo halkaasi muddooyinka dambe ka abaabulayay Ergooyinka Beeshiisa uga qayb gelaysa Shirka Taleex ka dhacaya ee Khaatumo 2.

 

Si rasmi ah looma oga waxyaabaha ay ka wada hadleen Wasiirka iyo Garaadku, hase yeeshee warar Xogo-gaal ah oo Wargeyska Waaheen ka helay dadka Magaaladaasi ku dhaqan iyo kuwo u dhuun daloola Booqashada Xaabsade Sool ku joogo ayaa tibaaxay inuu Wasiirku ka dalbaday garaadka inuu ka aqbalo gogol iyo wada-hadal siyaasadeed oo Xukuumadda Somaliland u fidisay Garaadka iyo Beelaha kale ee halkaasi degen, uguna yimi sidii ay Hargeysa isugu raaci lahaayeen si ay madaxweynaha iyo Xukuumaddiisa isaga arkaan arintaasi.

Wararku waxay sheegayaan in Garaad Jaamac ku gacan saydhay Dalabka Wasiirka, isla markaana ka cudur daartay inuu wakhtigan Hargeysa u soo raaco, maadaama xiligan lagu gudo jiro qabanqaabada Shirka Beelihiisu ku qabsanayaan ee lagu wado inuu ka furmo Degmada Taleex todobaadyada soo socda, kaasoo qabsoomidiisa mugdi badani ku jiro, isla markaana khal-khal iyo amni daro Xoogani soo food saartay Magaaladii uu ka dhici lahaa ee Taleex.

 

Garaad Jaamac Garaad Cali ayaa la sheegay inaanu Wasiirka toos ah ugu gacan saydhin dalabkiisa, balse u sheegay inaanu sinaba kaga maqnaan Karin shirka Khaatumo2, hadii uu Hargeysa tagano ay adagtahay inuu si dhakhso ah ugu soo laabto madasha shirka ee taleex, sidaa darted-na aanu Hargeysa u imanayn.

Wasiir Axmed Cabdi Xaabsade ayaa kulankaasi uu shalay kula yeeshay Saax-dheer Garaadka guud ee beelaha sool iyo buhoodle, ka dib dib ugu soo laabtay Magaalada Hargeysa oo uu soo gaadhay xalay fiidkii, iyadoo la filayo inuu dhawaan u baxo safar caafimaad oo uu ku tegayo dalka Ingiriiska