TFG President Sharif Ahmed there are no Ethiopians in Somalia But Kenyans are welcome

[Xaaji Xunjuf]

Madaxweynaha dowlada KMG Soomaaliya ayaa sharaxaad dheer ka bixiyey warar la isla dhax marayey maalmahan oo sheegayey in dowlada Itoobiya ay dib ugu soo laaban doonto Soomaaliya.

 

Madaxweynaha oo xalay marki ugu horeysay su,aalo toos ah uga jawaabay dad lasoo xulay oo ka kala socday qeybaha kala duwan ee bulshada magaalada Muqdisho ayaa sheegay in dowlada Itoobiya ay si cad uga sheegeen shirki IGAD ee dhawaan lagu soo gaba gabeeyey magaalada Adis Ababa.

 

Waxa uu qiray in aysan soo laaban doonin ciidamada Itoobiya balse ay difaacan doonaan xuduuda ay la wadaagaan Soomaaliya, sidoo kalana ay diyaar u yihiin in ay caawiyaan ciidamada dowlada KMG Soomaaliya iyo kuwa AMISOM.

 

“Dowalada Itoobiya waxay si cad uga sheegeen shirki IGAD in aysan daneyneyn in ay soo geliyaan ciidamo, waxaan is leeyahay waa go,aan aad u fiican oo taariikhi ah, mar walbo oo aan is aragno Itoobiya waxay i dhahaan marnaba ma daneyneyno in aan soo galno Soomaaliya, dowladaha qaar waxay ku adkeeyaan Itoobiaya ay in ay qeyb ka noqdaan howlgalka AMISOM, laakin Itoobiyaanka arintaasi waa diideen, waxay laakin ilaashanayaan xuduudkooda taasina xaq ayey u leeyihiin,” ayuu yiri Madaxweyne Shariif.

 

Dhanka kale madaxweynaha waxa uu ka hadlay arinta ciidamada Kenya ee jooga Soomaaliya isaga oo sheegay in Kenya ay xaq u leedahay in ay is difaacdo siday doontaba haku soo gashee Soomaaliya.

 

Madaxweyne Sharif ayaa marki ugu horeysay si toos ah usoo hor fariistay dad weynaha oo fursad u helay in ay su,aalooyin soo weydiiyaan, barnaamij gaar ah oo ay soo abaabushay hey’ada CRD.

 

Todobaadki hore sidaan oo kale waxaa su,aalooyin toos ah dadweynuhu weydiiyeen ra’isulwasaare C/wali oo isna ka jawaabay su,aalo dhowr ah oo ay weydiiyeen dad lagu casuumay barnaamijkaasi.

 

Horseed Media

[Xaaji Xunjuf]

Isniin, November 28, 2011 (HOL) − Madaxweynaha dowladda Soomaaliya, Sheekh Shariif Sheekh Axmed ayaa sheegay in Itoobiya aysan doonayn in ciidamadeeda ay soo geliso gudaha Soomaaliya, sidoo kale wuxuu sheegay in ciidamada AMISOM la soo kordhinayo tiradooda ayna ka howgeli doonaan gobollada dalka qaarkood.

 

Sheekh Shariif, ayaa hadalkan ka sheegay kulan dood-wadaag ah oo ay soo qaban-qaabisay hay'adda cilmi-baarista iyo wadahadalka CRD oo xalay ka dhacay xarunta madaxtooyada Soomaaliya.

 

"Shirkii ka dhacay Addis Ababa, wuxuu ahaa shir saraaxad leh, waxaa looga wada-hadlay in madaxbannaanida Soomaaliya ay tahay muqaddas iyo in Al-shabaab lala dagaalamo, waayo dowladda haddii aysan awood lahayn waxay mas'uuliyadu ka saaran tahay sidii lagu heli lahaa tallaabo walba oo xal lagu gaarayo iyadoo madax-bannaanida dalka la ilaalinayo," ayuu yiri Sheekh Shariif oo su'aal ku saabsan shirkii IGAD la weydiiyay.

 

Madaxweynaha Soomaaliya ayaa intaas ku daray in dowladda Itoobiya cadaadis lagu saaray inay ciidammo u dirto Soomaaliya balse ay madaxdeedu diidday, ayna sheegeen inaysan marnaba ciidammo u dirayn Soomaaliya.

 

"Madaxda Itoobiya waxay nagu yiraahdeen marna ma doonayno inaan ciidammo u dirno Soomaaliya, balse ay doonayaan inay hagaajiyaan dirsnimada, ayna mar walba kala hadlaan dowladda KMG Soomaaliya sidii ay ula dagaalami lahaayeen Al-shabaab," ayuu yiri Sheekh Shariif.

 

Sidoo kale, madaxweynuhu wuxuu sheegay in Itoobiyaanku ay diideen inay ka mid noqdaan ciidamada Midowga Afrika ee AMISOM, isagoo sheegay inay asbaabo ay ogyihiin ay ku diideen, taasoo uusan madaxweynuhu caddeyn balse wuxuu sheegay inay ahayd mid xikmad ku dhisan.

 

"Ciidamada Itoobiya doorkoodu waa inay adkeeyaan ammaanka xuduudaha ayna tababarro siiyaan ciidamada DKMG ah," ayuu yiri Sheekh Shariif oo sheegay in ciidamada AMISOM tiradooda la gaarsiin doono 12,000, ayna ka howlgeli doonaan gobollada dalka qaarkood.

 

"Ma doonayo inaan halkaan ku faahfaahiyo arrimaha milateriga, balse waxaa jira qorshe la doonayo in ciidamada AMISOM lagu kordhiyo si ay uga howlgalaan gobollada dalka qaarkood," ayuu yiri Sheekh Shariif Sheekh Axmed.

 

Kulanka dood-wadaagga ah ayaa waxaa ka qaybgalay boqolaal dad ah, iyadoo su'aalaha la weydiinayay madaxweynaha ay u badbaayeen dib u dhiska Muqdisho iyo ammaanka, isagoo su'aal walba si cad uga jawaabayay.

 

"Mar walba waxaan ku celinaynaa inay albaabbadeenu furan yihiin kuwa nabadda doonaya, marka waxaan leennahay joogi dambiga oo u soo laabo jidka toosan," ayuu yiri Sheekh Shariif oo ka jawaabayay su'aal ahayd go'aanka dowladda ee ku aaddan Xarakada Al-shabaab.

 

Ugu dambeyn, wuxuu sheegay in ammaanka Muqdisho la adkeeyay, isla markaana ay socdaan mashaariic lagu dayactirayo waddooyinka kuwaasoo ay qayb ka yihiin mashaariicda Turkigu ka fulinayo dalka, wuxuuna dhinaca kale ugu baaqay dadka Soomaaliyeed inay qayb ka qaataan dib u dhiska dalka.