AMISOM we have plans in place to take over city Museveni the Bakara is inhabited by Al Shabaab

[General Duke]

Afhayeenka AMISOM oo sheegay inay qorsheynayaan inay isku ballaariyaan degmooyinka Muqdisho

 

Jimco, 18 Feberaayo, 2011 (HOL) – Afhayeenka AMSOM Maj. Barigye Bahuko ayaa sheegay maanta oo Jimco inay wadaan qorshe ay isugu ballaarinayaan degmooyinka Muqdisho, balse wuxuu ka gaabsaday inuu sheego xilliga uu howlgalkaas billaabayo.

 

“Qorshaha ayay noogu jirtaa inaan ballaarino fariisimaheenna millateri ee Muqdisho, horay ayaan ula wareegnay goobo badan, haddana waxaan doonaynaa inaan goobo kale oo cusub la wareegno,” ayuu yiri Maj. Barigye oo wareysi siiyay idaacadda Shabeelle ee Muqdisho.

 

Afhayeenku wuxuu sheegay in ciidamadooda ay diyaar u yihiin inay dagaal la galaan Xarrakatul Shabaab oo diidan jirtaanka dowladda Soomaaliya iyo joogitaanka ciidamada AMISOM ee garabka siiya dowladda.

 

Ciidamada AMISOM oo tiradoodu tahay 8,000-askari ayaa ka socda dalalka Uganda iyo Burundi, waxayna Muqdisho kaga sugan yihiin saldhigyo ku yaalla degmooyinka ay gacanta ku hayso dowladda Soomaaliya.

 

Maj. Bahuko wuxuu sheegay inay socdaan wadatashiyo siyaasadeed oo xal loogu raadinayo dalka Soomaaliya, kaasoo uu xusay inay u leeyihiin ururka Midowga Afrika, dowladda KMG ah, dalka daneeya Soomaaliya iyo beesha calaamka.

 

“Hadafka wadatashiyadan waa mid looga gol-leeyahay in xal looga gaarayo arrimaha dalka Soomaaliya iyo muranka siyaasadeed,” ayuu yiri afhayeenka AMISOM, isagoo aan sheegin halka ay kulammadaas ka socdaan.

 

Dhanka kale, afhayeenka AMISOM wuxuu ku eedeeyay ciidamada dowladda inay dhibaatooyin iyo falal ammaan xumo ka wadaan degmooyinka ay dowladdu ka taliso, isagoo madaxda DKMG ah ka codsaday inay falalkaas ammaandarro wax ka qabtaan.

 

 

Maxamed Xaaji Xuseen, Hiiraan Online

maxuseen@hiiraan.com

Muqdisho, Soomaaliya