Governor Of Benadir Says Puntland Citizens Are Unity Seekers

[Abdirazak_PTL]

 

Guddoomiyaha Gobolka Banaadir:”Waxaan Puntland Kusoo arkay Shacab Jecel in Soomaali ay iskusoo noqoto”

 

Guddoomiyaha gobolka Banaadir ee Dowladda Federaalka Maxamuud Axmed Nuur ”Tarzan” oo ka hadlaayay munaasabad lagu soo dhowaynayay ciyaaryahanada Xulka gobolka Banaadir oo maanta ka dhacday magaalada Muqdisho ayaa sheegay in Puntland uu ku soo arkay xiligii uu socdaalka ku tagay dad Soomaaliyeed oo aan xumaan iyo xasad ku jirin isla markaasna jecel Soomaalinimada.

 

Wuxuu intaasi ku daray in dadwaynaha ku nool Puntland ay yihiin dad ay ka go’aan tahay in ay arkaan Soomaali isku soo noqotay oo isdhexmaraysa.

 

Xaflada oo ka dhacday magaalada Muqdisho ayaa waxaa kasoo qaybgalay maamulka gobolka Banaadir,saraakiil ka socotay bahda cayaaraha Soomaaliyeed,cayaaryahanada gobolka Banaadir ee hantay koobka gobolada Soomaaliya ee dhowaan ka dhacay magaalada Garoowe iyo dadwayne kale.

 

Dhanka kale Maxamuud Tarsan ayaa oo soo hadal qaaday xaalada Muqdisho ayaa hoosta ka xariiqay in 20-kii sano ee ugu dambeeyay magaalada lagu hayay cuno qabatayn horseeday in la waayo goobihii waxbarashada caafimaadka iyo kaabayasha dhaqaalaha.

 

“…Kooxaha diidan nabada waxay ogyihiin haday Muqdisho nabad noqoto in Soomaaliya inteeda kale ay sal dhiganayso…”,ayuu yiri.

 

Mudane Tarzan ayaa ku eedeeyay kooxaha ka soo horjeeda Dowladda in ay dhaxleen hantida iyo carruurta Soomaaliyeed oo nool,siduu sheegay.

 

Xulka gobolka Banaadir ayaa hantay tartanka 18-aad ee koobka gobolada Soomaaliya oo dhamaadkii sanadkii lasoo dhaafay ee 2010-ka lagu qabtay Puntland.

 

Horseed Media