Wiil dhallinyaro ah oo nafta looga qaaday toorey iyo xabbad magaalada Muqdisho

[oba hiloowlow]

Wiil magaciisa lagu soo gaabiyay Saciid dhowaanna ka yimid dalka Masar oo uu ku dhameystay waxbarasho jaamacadeed ayaa shalay lagu dilay xaafad ka tirsan Suuq Bacaad, iyadoo dilkiisana la sheegayo inay ka dambeeyeen maleeshiyaad ka tirsan ururka Al-Shabaab ee maamula degaanadaasi.

 

Nin lagu magacaabo Axmadey oo ilmo habreed ay yihiin wiilka la dilay ayaa sheegay in walaalkii Saciid uu degenaa Baar Ubax, isla markaasina lagu dilay Suuq Bacaad oo uu u tegay inuu booqdo wiilal ay saaxibo ahaayeen, isagoona sheegay in maleeshiyo ka tirsan ururka Al-Shabaab ay qabteen kaddibna ka qaaday taleefanka gacanta oo uu watay.

 

Waxa uu sheegay in marxuum Saciid ay maleeshiyadii ka qaaday taleefanka ay maalintii dambe u sheegeen inuu taleefankiisa soo doonto, hase yeeshee markii uu tegay maleeshiyadii ay gashteen guri ku yaala agagaarka Suuq Bacaad kaddibna la dhaceen toorey, iyagoo markii dambena ku dhuftay dhowr xabadood.

 

Ilaa iyo iminka ma jirto cid sheegatay inay ka dambeysay dilka wiilkaasi, hase yeeshee ehelada uu wiilka la dilay ka soo jeedo ayaa fursad u helay inay soo qaataan meydka wiilkooda si ay u aastaan, wuxuuna sidoo kale sheegay Axmadey in falalka noocaan ah iyo kuwo ka sii daran ay maleeshiyada Al-Shabaab u geystaan dadka rayidka ah ee iyagu degan goobaha ay maamulaan.

 

http://www.somaliweyn.org/pages/news/Dec_10/25Dec10.html