Xarakada Al Shabaab oo sheegtay in maal-maha soo socda ay dagaal kula wareegi doonto Muqdisho

[oba hiloowlow]

Xarakada Al Shabaab ayaa wacad ku martay in maal maha soo socda ay dagaalo kula wareegi doonto caasimadda dalka Soomaaliya ee Muqdisho, iyadoo sheegtay in’ay diyaar u tahay dagaalo kulul oo ay la-gasho dowladda Soomaaliya iyo ciidamadda Midowga Afrika ee Amisom.

 

Afhayeenka guud ee Xarakada Al Shabaab Sheekh Cali Maxamuud Raage “Sheekh Cali Dheere” oo maanta laga maqlaayay warbaahinta magaaladda Muqdisho ayaa wuxuu shaaca ka qaaday in dagaalo xoogan ay dowladda kala wareegi doonaan goobaha ay kaga sugan tahay magaaladda Muqdisho.

 

Afhayeenka ayaa sheegay in ciidamadda Xarakada Al Shabaab ay diyaar u yihiin dagaalo xoogan oo ay magaaladda Muqdisho, kaga saaraan dowladda uu madaxweynaha ka yahay Shariif Sheekh Axmed iyo Ciidamadda Nabad Ilaalinta ee ka socda Midowga Afrika ee Amisom.

 

Sidoo kale wuxuu sheegay in’ay ka go’an tahay sidii ay magaaladda Muqdisho uga sifeen lahaayeen dowladda Soomaaliya iyo ciidamadda Amisom oo uu sheegay in’ay kusoo duulleen dalka Islaam ah.

 

Sheekh Cali Dheere ayaa rajo ka muujiyay in hadafka Xarakada Al Shabaab oo ah sidii ay dalka uga saari lahaayeen ciidamadda Amisom iyo dowladda Soomaaliya, in’ay dhawaan hir-gelli doonto.

 

Hadalka Afhayeenka guud ee Xarakada Al Shabaab Sheekh Cali Maxamuud Raage “Sheekh Cali Dheere” ayaa wuxuu kusoo aadaayaa, xilli Xarakada Al Shabaab iyo dowladda Soomaaliya ay iska soo dhisaayaan dhanka miletariga, tiiyoo ay u dheer tahay iyadoo todobaadka soo socda magaaladda Muqdisho loo-soo wado 1,800 oo askari oo ka socda dowladda Uganda, sida uu ka dhawaajiyay madaxweynaha dalka Uganda Yoweri Museveni