Shabaab oo nin gowracay iyo Shabaab lagu laayay agagarka Leego

[oba hiloowlow]

Maleeshiyaadka Shabaab ayaa gowrac ku dilay nin rayid ah kadib markii Horjooge iyo Maleeshiyaad ka tirsan Shabaab habeenkii xalay lagu dilay inta u dhaxeeysa Magaalooyinka Leego iyo Bur hakaba oo ka kala tirsan gobolada Shabeelada hoose iyo Baay.

 

Habeenkii xalay ayaa kooxo hubeysani waxa ay wadada u galeen gaari uu watay horjooge ajnabi ah oo u dhashay Sacuudiga laguna magacaabi jiray C/lla Muhaajir, waxaana halkaasi ku geeriyooday horjoogahaasi iyo sadex ka mid ah Ilaaladiisii oo Soomaali ahaa, sidoo kale waxaa halkaasi ku basbeelay gaarigii ay wateen kadib markii kooxahasi ay baasuuke ku dhalaaliyeen.

 

Maleeshiyaad ka tirsan Shabaab ayaa aroornimadii hore ee saaka waxa ay ku kalaheen dadkii reer miyiga ahaa ee ka dhawaa hareeraha wadada waxa ayna soo kaxeeysteen nin deegaankaasi caan ka ahaa oo magaciisa lagu soo gaabiyay Ufuroow, kaas oo bartamaha laamiga ay ku gowraceen madaxiisana xabadka u saareen si ay ugu baqdin geliyaan dadka deegaanka.

 

Arintani ayaa la rumeysanyahay in ay qeyb ka tahay dagaaladii u dhaxeeyay maleeshiyaadkii burburay ee Xisbiga iyo Shabaab, kuwaas oo maalmo ka hor ku dagaalamay Bur hakaba iyo deeganno ku xeeran.

 

http://radiomuqdisho.net/news/wararka/2879-shabaab-oo-nin-gowracay-iyo-shabaab-lagu-laayay-agagarka-leego.html