BUUHOODLE: Yaan Marxuum Noole Sahayan ! ! !

[Jacaylbaro]

Markaan degmo qaboojaa mid kale

 

Dogob ka qiiqaaye

 

Dab markaan baqtiiyaa mid kale

 

Duur ka ololaaye

 

Ayax markaan didshaabaa mid kale

 

Ugax dillaacaaye

 

Hadba wiil darmaanaa wadhida

 

Loo deldelayaa

 

 

 

Inta noloshu jirto baalayana wey jiraysaa, haseyeeshee waxa aadmiga la gudboon markay balaayo hor timaaddo inay ku dadaalaan inay firdaamiyaan iyagoo ilaahay talo saaranaya. Marka arrin dhaco ninka nool baa loo taliyaaye ninka dhintay looma tasho.Haddaad tidhaahdo “Waa inaan ninkii dhintay arrinkiisa ka taliyaa,” taa micnaheedu waxa weeye waxaan doonayaa in dad kale iga dhintaan. Ninka dhintay sooma nooleyn kartid waxna uma tari kartid, wax xil ah oo kaa saaranina ma jiro, waayo qof nolosha kula wadaagaba maaha oo aakhiro ayuu kaa tegay. Waxa in loo taliyo, oo la badbaadiyo u baahan qofka nool ee weli ifka jooga. Waa in caqligu garto qofka hiilka ka sugayaa inaanu ahayn qofkii dhintay. Waa in dadku fahmo qofka hiilka iyo hooda uga baahani inuu yahay qofka nool.

 

Ayaandarrada had iyo goor Soomaalida haysataa waxa weeye qofkii dhintay ayaa lagu dadaalayaa in loo hiiliyo, qofkii noolaana waa la hilmaamayaa hiilkiisa, dabeedna marxuum baa noole sahayanaya.

 

 

 

Hadba danab la looganayo baan

 

U digleeyahaye

 

Dubashada barbaartaa jidh kani

 

Ila dubaaxshaaye

 

Qalbigaygu wuu diiddan yahay

 

Dirirta ceebeede

 

Damiirkaygu kuma hiili karo

 

Dalabka haybeede.

 

 

 

Guud ahaan dadka Soomaalida ah ee dagaalku ka dhex oogan yahay waxaan ugu baaqayaa inay joojiyaan colaadda, gartaanna in dhiiggoodu kala xaaraansan yahay.

 

Gaar ahaan waxaan labada qoys ee walaalaha ah ee reer Buuhoodle, ee qaylada cusubi ka soo yeedhay ugu baaqayaa inay dadka inta hadhay naarta ka badbaadiyaan, uguna yeedhaan nabadda iyo walaalnimada.

 

 

 

Waxaan walaalaha dirirtu ka dhexayso leeyahay:

 

 

 

Birmad

 

 

 

Imisaan isu baannay

 

Isu reero bu’aynay

 

Baaba’eenniyo hoogga

 

Imisaynu bileynay

 

Imisaan is bireynay

 

Imisaan is bog dooxnay

 

Beelo la isugu duulay

 

Bahbah la isu wareemay

 

Imisaynu billaawe

 

Iyo baallacad qaawan

 

Ku baalbaallay jidhkeenna

 

Imisaynu birteenna

 

Boqneheenna ku goynay

 

Bunduqeenna afkiisa

 

Intee Baashe ku hoyday

 

Intee baarcadde mootan

 

Intee baarri wanaagsan

 

Bidhaantiisa la waayey

 

Intee baa bilcan door ah

 

Boqorkeedii la toogtay

 

Bilayaal asay qaadday

 

Intee baa ubad booyey

 

Intee baa la baroortay

 

Intee baa belo qiiqday

 

Intee baynu ku baaqnay

 

Baa’bi’ii nolosheenna

 

Intee baa birmadkeennu

 

Burburkeenna horseeday

 

Waar maxaa ina baabay?

 

 

 

Annakaa bokhrantii iyo

 

Annakaa ba’antii iyo

 

Annakaa bilantii iyo

 

Annakaa burji weyniyo

 

Baanisiiba la eedye

 

Bulshayey idil kaaba

 

Bugtadaa kugu taal

 

Ma bogsooto miyaa?

 

 

 

Ergo-oday

 

 

 

Intee baynu balaayo

 

Iyo baase u joognay

 

Intee baa baqtigeenna

 

Bahal uu guranaayey

 

Taladeenna baroon iyo

 

Intee boobe hagaayey

 

Waa sidee badankeenu

 

Waa beer-gooyiyo ciile

 

Hadhaageenna badbaadshoo

 

Halla baajiyo dhiigga!

 

..................................

 

Baaruuddaa ololaysiyo

 

Bunduq wiil dhaliwaaye

 

Ba ba’naan iyo xoogna

 

Bogsiin waaye dhibaatoo

 

Horaa loogu bog-dooxmee

 

Baajintaa ka wanaagsan

 

Colaad baaniseheede

 

Waa beer-gooyiyo ciile

 

Hadhaageenna badbaadhshoo

 

Halla baajiyo dhiigga.

 

 

 

Birta la iska aslaayo

 

Boqnaha la iska jaraayo

 

Inta biixi jabaysa

 

Inta maal burburaysa

 

Beled taagan dumaaya

 

Naf Illaahay baxaysa

 

Rabbigeen ma banayne

 

Waa beer-gooyiyo ciile

 

Hadhaageenna badbaadshoo

 

Halla baajiyo dhiigga

 

 

 

Inakoo isku beer ah

 

Boggeenii isku yaallo

 

Boqorkii wada raacnay

 

Haddii aan is birayno

 

Baguugaa iska yeelno

 

Berritaan cadawgeenna

 

La iska baacin karayne

 

Waa beer-gooyiyo ciile

 

Hadhaageenna badbaadsho

 

Halla baajiyo dhiigga.

 

 

 

Ilaahay waxaan ka baryayaa inuu damiyo dagaalka Buuhoodle iyo colaadaha kale soomaalida ka dhex aloosanba, kuna bedelo is afgarad iyo walaaltinimo.

 

 

 

Aamiin… Aamiin