Cowke Posted May 28, 2010 Duqa Degmada Gaalkacyo Oo Xariga Ka Jaray Dhisme Ganacsi Oo Laga Hirgaliyey Suuqa Gaalkacyo (Sawiro). Cawil Maxamuud Cabdi RBC Radio, Gaalkacyo Cawil@raxanreeb.com Gaalkacyo (RBC Radio):- Duqa degmada Gaalkacyo Mudane C/raxmaan Maxamuud Xaaji Xasan ayaa maanta xariga ka jaray dhisme ganacsi oo cusub kaasi oo laga dhisay bartamaha suuqa weyn ee magaalada Gaalkacyo. Dhismahani oo loogu magac darey Gurac Bussines Building, ayaa waxaa uu yahay dhisme dabaq ah, waxaana laga dhisay ka soo horjeedka Suuqa Bangiga ee magaalada Gaalkacyo, halkaasi oo ay ka dhisan yihiin bakhaaro iyo dukaamo la dhisay in ka badan 40 sano ka hor. Goobta laga dhisay xaruntani ganacsiga cusub ayaa horey waxaa uga dhisnaan jiray dhisme kuwii hore ah, waxaana milkiilaha gurigani uu ku dhiiraday in uu badalo oo ka dhigto dhisme qurux badan, si ganacsatada kalena ay ugu daydaan maadaama halka gurigaasi laga dhisay ay tahay xaruntii dhexe ee magaalada isla markaana ay lagama maarmaan u tahay in bilicdeeda la qurxiyo. Duqa Degmada Gaalkacyo C/raxmaan Maxamuud ayaa mahad celin u jeediyey milkiilaha xaruntaasi Liibaan Abshir Gurac, waxaana intaa uu ku daray in dhismaha xaruntani ay ka dambeysay kadib markii Dawladda hoose ay buushashkii iyo sandaqadihii sharci darrada ahaa ka qaadey gudaha magaalada, isaga oo intaa raaciyey in loo baahan yahay in dadka kale ee ganacsatada ah in laga doonayo in ay ku daydaan milkiilaha xarunta Gurac Bussines Building oo ay iyaguna bedelaan guryihii duugoobay ee ku yaala gudaha magaalada gaar ahaan suuqa Gaalkacyo. Liibaan Abshir Gurac oo ah milkiilaha xarunta ganacsiga ee uu Duqa Degmada xariga ka jaray ayaa sheegay in uu ku dhiiraday in uu dhismahani cusub dhiso, isagoo sheegay in uu dumiyey dhismihii hore ee xaruntaasi oo la dhisay in ka badan 40 sano kahor, waxaana uu intaa ku daray in shaqsi kasta oo muwaadin ah laga doonayo in uu ka shaqeeyo horumarka iyo bilicda magaalada, isaga oo si gaar ahna u xusay in maamulka degmada Gaalkacyo uu door weyn ka ciyaarayo bilicda magaalada, dadkana looga baahan yahay in ay ku garab istaagaan. Munaasabada xariga looga jarayey xaruntani ganacsiga ayaa waxaa ka soo qeyb galay mas’uuliyiin ka socota degmada Gaalkacyo, Ganacsato iyo marti sharaf kale, waxanaa halkaasi dadkii ka hadley ka mid ahaa Ganacsade C/risaaq oo sheegay in uu deris la yahay xaruntani cusub, waxaa uuna sheegay in uu aad uga maseyray dhismahaasi, isla markaana uu ku talo jiro in uu badalo naqshada gurigiisu u dhisan yahay. Foos C/nuur ayaa dhinaca haweenka ka qeyb galay madashaasi u hadashay waxayna mahad celin u jeedisay milkiilaha gurigaasi iyo maamulka degmada Gaalkacyo, kuwaasi oo ay ku amaantey in ay sameeyeen waxyaabo lagu dayan karo. Foos Cabdi Nuur oo madasha hadal iyo buraanbur ka jeedisay. RBC Radio. This Guy Looks Like Hustler from G-TOWN Quote Share this post Link to post Share on other sites
