Ciidamada dowladda Federaalka oo laban laabay dhaca ay ka geysanayaan

[Member-sol-]

Ciidamada dowladda Federaalka oo laban laabay dhaca ay ka geysanayaan qeybo kamid ah degmooyinka Gobolka Banaadir.

Posted: 9/12/2008 3:23:00 PM

Shebelle: MUQDISHO

Askarta dowladda KMG ah ee Soomaaliya ayaa maanta waxa ay laban laabeen dhaca ay u geysanayaan dadka rayidka ah.

 

 

 

Falalkan dhaca ah ee kusoo badanaya magaalada Muqdisho ayaa waxaa geesanaya Ciidamada Dowladda kMG ah ee Soomaaliya gaar ahaan Ciidamada Militariga iyadoo Ciidamada ay laba jibaareen dhaca baaxadda weyn ay shacabka Gobolka Banaadir kudhaqan u geysanayaan.

 

 

 

Dhacani ay geysanayaan ayaa waxaa si weyn looga dareemay Dhammaan gudaha magaalada Muqdisho, Isgoyska dabka ayaa shalay iyo maanta waxaa kajira dhac baahsan oo loo geysanayo gawaarida xamuulka ah ee wada raashiinka Mucaawinada ah waxaana saakay boob ay u geysteen gaadiid wada Mucaawino kaasi oo gabi ahaanba la boobay dhammaan wixii uu siday xiligii ay boobka geysanayeenna waxa ay fureen tacshiirad xoogan oo qal qal ku abuurtay dadkii xilligaasi halkaa marayay sida uu shabelle u xaqiijiyay mid kamid ah dadka deegaanka.

 

 

 

Waxa uu sheegay ninkaasi u waramay shabelle in dadka saakay loo baaranayay si safmareen ah isla markaasina gawaarida Mucaawinada sida wixii saarnaa oo idil ay ciidamadu raranayeen.

 

 

 

 

Sidoo kale waxa ay dhac u geysteen gawaarida BL-ka ee wadada Makka Almukarrama ka shaqeeya ee aada Suuqa Bakaaraha taasi oo gabi ahaanba dadkii saarnaa wax waliba oo ay wateen ay Ciidamada dowladda ka qaadanayeen waxayna si gaar ah dadka ugu baaranayeen halka loo yaqaano iskuulka dhagaxtuur ama Barxadda Hodan.

 

 

 

Qeybo kamid ah degmada Dayniile iyo wadada dheer ee isku xirta wasaaraddii hore ee gaashaandhiga iyo isgoyska Ex-Control Afgooye ayaa waxaa kajira falal isugu jira dhac iyo arrimo kale oo shacabka loo geysanayo ayna geysanayaan Ciidamada dowladda ee kusugan xerooyinka shiirkole iyo Guulwadeyaasha waxaana gudaha ay u galaan xaafadaha raadeerka ee Degamda Dayniile waxayna gacanta sii marsiiyaan gaadiidka BL-ka ee halkaasi ka hawlgala sida uu shabelle u sheegay mid kamid ah dhalinyarada xaafaddaasi degan.

 

 

 

Ciidamada ayaa sidoo kale waxa ay dhac ka wadaan Xaafadda Nasteexo, Macmacaanka, Suuq Boocle iyo tabakaaya madow oo si safmareen ah ay halkaasi dhac uga geystaan.

 

 

 

Maalintii shalay ayaa haweenka khudaarta ku iibiya Suuqa Degmada Xamar weyne waxaa laga qaatay guud ahaan lacagihii ay maalintaasi oo idil ay shaqeeyaan kadib markii suuqaasi ay galeen Ciidamada Militariga dowladda Federaalka Soomaaliya, waxayna sidoo kale dhac iyo boob xoogan ay u geystaan dukaamada iyo goobaha ganacsi ee kuyaalla Degmada Xamar weyne.

 

 

 

Sida muuqata Ciidamada ayaa u soo shaqa taga shacabka danta yar ee kudhaqan Gudaha Magaalada Muqdisho xoolahooda xilli sicir barar baahsan uu kajira Guud ahaan dalka gaar ahaan Gobolkan Banaadir oo dad aad u fara badan ay ka barakaceen halka inta kale ee joogtana dhibaatooyin kala duwan ay la daalaa dhacayaan.