Dhuusamareeb After the US Attack

[Jacaylbaro]

Hubka Maraykanka siiba, Gantaalada meelaha fog-fog wax ka dila oo ay ku jiraan waxa loo yaqaano Depleted Uranium ama Uranium-ka la qafiifiyay ayaa meelaha ay ku isticmaalaan Maraykanku waxa ka soo baxa cuduro degdeg ah iyo kuwo wakhti dheer qaata. Ciidamada Maraykanka ee ka soo laabta dagaalada Ciraaq iyo Afganistan ayaa intooda badan waxa ku dhaca cuduro ay sababaan kiimikada ku jirta hubka ay adeegsadaan.

 

Duqayntii gantaalaha Maraykanka ee magaalada Dhuusa-mareeb ayaa la soo sheegayaa in ay durbadiiba sababtay cuduro muuqada iyo kuwa aan muuqan oo laga yaabo in ay wakhti dheer qaataan soo if-baxoodu. Waxa la soo sheegayaa in dadkii ka ag dhawaa goobtii gantaaluhu ku dheceen ay si joogto ah u matagaan maalin walba iyaga oo ka sheeganaya la-labo iyo laabjeex. Waxa intaas ka daran oo la so sheegayaa dad ku indhabeelay kiimikada gantaalahaas, dadkaas oo wax dhaawac oo aad u weyni aanu soo gaadhin xiligii qaraxyadu dhaceen, laakiin kadib waayey aragoodii.

 

Maadaama aanay ka jirin Somalia dawlad dayactirta dadkeeda iyo ururo caafimaad waxaa adkaan doonta in loo helo daryeel caafimaad dadka dhibaatadu ka soo gaadhay Gantaaladii Sunta Xambaarsanaa ee lagu garaacay Dhuusa-mareeb, mana la filayo in baadhis caalami ah lagu sameeyo goobta uu ku dhacay hubkaasi si loo ogaado nooca kiimakada ah ee halkaas ku faaftay.