Puntland Security Forces Inspecting Homes In Bossaso

[Cowke]

BOOSAASO: Ciidamada amaanka Puntland oo bilaabay Baritaanka Guryaha Magaalada Boosaaso

Posted to the Web Jul 22, 06:53

 

 

Garoowe: (pp)- Saraakiisha sar sare ee Maamulka Puntland ayaa go’aan ku gaaray in magaalada Boosaaso Guri Guri loo baaro , si loo yareeyo mushaakilaadka iyo dhibaatada amaan ee ka jirta magaalada Boosaaso.

 

Ciidamada amniga ayaa culayska saaraya Xaafado gaar ah oo laga soo abaabuli jiray dhibaatada amaan xumo ee ka jira magaalada Boosaaso, waxaana Booliiska magaaladaasi ay Ciidamo badan geliyeen Xaafadaha New Boosaaso iyo Laanta Hawada.

 

Xaafadaha la baarayo ayaa ku yaalla dhanka galbeed ee magaaladda,waxaana ay yihiin labada xaafadood ee lagu kala magacaabo New Bosaaso iyo Laanta Hawada, iyadoo xaafadahaas ay aad u baarayaan Ciidamada Booliska , kuwaas oo Guri Guri ubaaraya Xaafadahaas.

Baaritaanka ayaa ku kooban xaafadahaas, waxaana la sheegayaa in dhamaan Xaafadaha magaalada Boosaaso lagu kaamil yeeli doono baaritaanadaas , si ay Puntland uga qaadato sawir guud xaalada magaalada Boosaaso.

Booliiska magaalada ayaa guryaha ku garaacaya dadka degan iyagoo waydiinaya warbaxino kala duwan, waxaana xaafadaha qaarkood laga soo sheegayaa inay booliiska aad u soo dhowaynayaan baaritaankooda.

Duqa magaalada Boosaaso oo isagana ka hadlay Baaritaanadaas, ayuu ku sheegay inuu yahay mid lagu sugayo amaanka magaalada boosaaso, maadaama ay Magaalada Boosooso ay marar badan ka dhaceen dilal qorshaysan, isagoo aad u soo dhaweeyey howlgaladaas, dadkana ka codsaday inay la shaqeeyaan Laamaha Amaanka.

 

Sikastaba, maamulka Puntland ayaa waqtigan loo maleeyaa inay ka dhamaatay dulqaadkii , waxaana marar badan horay u dhacday in magaalada Boosaaso lagu qaarajiyey shicib iyo saraakiil ka tirsan maaamulka Puntland , arrimahaas oo ay maamulka Puntland ay isaga aamuseen, waxaana hadda loo maleeyaa inay waqtigan dareemeen masuulka ka saaran badbaadinta shacabka Puntland , iyadoo aad loo soo dhaweeyey howlgalada ay ka wadaan deegaanada Puntland.

 

Saciid C/salaan Saciid

 

Wakiilka Puntlandpost, Garoowe, Soomaaliya

[Cowke]

BOOSAASO : Ciidanka oo xoog ku galay guri ay ku jireen koox la dagaalantay

Posted to the Web Jul 21, 14:26

 

Boosaaso:-Ciidanka Booliska iyo Ciidanka Daraawiishta Puntland oo iskaashanaya ayaa maanta xoog ku galay guri ay ku jireen koox dhalinyaro ah oo Ciidanku iska caabin kala kulmay, waxaana la sheegay in guriga loogu tagay 9 dhalinyaro ah oo hubaysan kuwaas oo xabsiga la dhigay.

 

Ciidanka Puntland, ayaa muddo 3 bari ah hawlgalo ballaaran ka wada magaalada Xeebta ah ee Boosaaso waxaana magaaladaasi laga masaafuriyay in ka badan 600 oo qof oo dhalinyaro ah oo ka soo jeeda Koonfurta dalka, wuxuuna maamulka Puntland ay dhalinyaradan ku eedeeyeen in wadeen qorshayaal lid ku ah ammaanka oo laga soo abaabulay Koonfurta dalka.

 

Talaabadan lagu qabqabanayo dadka ka soo jeeda Koonfurta ayaa dadka siyaabo kala duwan u arkeen, waxayna dadka qaar aaminsan yihiin in xal loo heli doono ammaanka haddii dadkan dib loo cesho, halka dadka qaarkoodna ay u arkaan in ay haboonaan lahayd in dambiilayaasha iyo kuwa aan dambiga lahayn la kala saaro ee Ummadda Koonfureed oo dhan la masaafurin.

 

Saciid Cabdisalaam Saciid

Wakiilka-Puntlandpost-Garoowe