Janaqow Alshabaab cidii ra'yigooda diida way dilayaan, markaasee leeyihiinwaa Cadawg

[Liqaye]

Xoghayaha Guud ee Isbaheysiga Dib u xoreynta garabkiisa Jabuuti Sheekh C/raxmaan Janaqow ayaa weerar kulul ku qaaday Xoogaga Alshabaab ee ka mid ah kuwa ka dagaalama Soomaaliya, isagoona ku eedeeyay inay wadaan falal lid ku ah shareecada Islaamka.

 

Sheekh C/raxmaan Janaqow ayaa sheegay in Alshabaab aanay dooneyn in nabad ka dhalata Soomaaliya, isla markaana ay sii adkeeyaan joogitaanka Ciidamada Ethiopia, waxaana uu waxba kama jiraan ku tilmaamay eedeymo horay Isbaheysigooda garabka Jabuuti ay usoo jeediyeen Alshabaab, kaas oo Buug ay soo saareen ku sheegay inay ku kaceen falal diinta looga baxay.

 

Isagoo ka hadlayay Masjid ku yaal agagaarka Hotelka Lafweyn ee ay degan yihiin Wafdiga Isbaheysiga Dib u xoreynta ayuu Muxaadaro uu ka jeediyay si kulul u cambaareeyay ujeedooyinka ay wataan Kooxda Alshabaab.

 

 

Sheekh C/raxmaan Janaqow oo ahaa Kuxigeenkii koowaad ee Gudigii Fulinta Maxkamadaha Islaamka ayaa sabab uga dhigay bur burka ku yimid Maxkamadaha Kooxda Alshabaab, kadib markii uu sheegay inay ka go'een, isla markaana keli iska dhigeen.

 

"Alshabaab cidii ra'yigooda diida way dilayaan, markaasee leeyihiin waa Cadawga ilaahey, aniga waxaan u heystaa inay nimankaas caadi aheyn oo dad cadaw ah ay ku dhex jiraan"ayuu yiri Sheekh C/raxmaan Janaqow oo intaa ku daray in aysan jirin cid ka baxsaneysa Alshabaab oo cid walba oo ra'yiga ku khilaafta ay dilayaan, isla markaana ay ku xukumayaan inay Murtad noqdeen sida uu hadalka u dhigay.

 

Waxaa uu sidoo kale sheegay in Culimada dhex dhexaadinta waday ay eedeyn usoo jeediyeen, isla markaana ay khilaafeen, wuxuuna cadeeyay inay ku dhaqaaqeen tallaabooyin ay ku bur buriyeen Maamuladii dalka oo ay ku qabsadeen deegaano Maamulo horay u lahaa.

 

"Hadii aan dhahno Ethiopianka ha baxaan Ma Murtad baa nahay, hadii hala wada hadlo aan dhahno ma Murtad baa nahay, marka Alshabaab intaas oo dhan wey diidan yahay, in dagaal la sii wado mooyee wax kale ma rabaan, waayo jiritaankooda ayaa dagaal ah, Nabad hadey timaada ma jiri doonaan"ayuu mar kale ku celiyay Sheekh Janaqow oo ah Mas'uulkii u horeeyay garabka Sheekh Shariif oo weerar kulul ku qaada Ururka Alshabaab.

 

Ma jirto ilaa iyo hada jawaab ka timid Ururka Alshabaab oo ku aadan weerarkan afka ah ee uu ku qaaday Sheekhan xulufada la ah Sheekh Shariif, inkastoo horay Ururka Alshabaab eedeymo ugu soo jeediyeen, isla markaana Buug ka soo saaray Garabka Sheekh Shariif oo ay ku sheegeen inay ku kaceen wax ka baxsan Diinta islaamka.