Donald Trump oo shaaciyey in Sacuudi Carabiya ay xiriir la sameysan doonto Israel

[Deeq A.]

Washington (Caasimada Online) – Madaxweynaha Mareykanka Donald Trump ayaa sheegay inuu kalsooni ku qabo in Sacuudi Carabiya ay xiriir diblomaasiyadeed la yeelan doonto Israa’iil, sida uu ku sheegay wareysi uu siiyay majaladda Time oo la daabacay Jimcihii.

“Saudi Arabia waxay ku biiri doontaa heshiisyada Abraham,” ayuu yiri Trump, isaga oo xiganaya heshiiskii taariikhiga ahaa ee dhammaadkii xilligii uu xilka hayay 2020, kaas oo waddamada Imaaraadka Carabta, Baxrayn, Suudaan iyo Marooko ay ku oggolaadeen inay caadiyeeyaan xiriirkooda Israa’iil.

“Waa ay dhici doontaa arrintaas,” ayuu sii raaciyay.

Trump ayaa la filayaa inuu booqdo Sacuudi Carabiya bisha soo socota, isagoo ku guda jira socdaal uu ku tegayo Bariga Dhexe, taas oo loo arkayay safarkiisii ugu horreeyay ee dibadda tan iyo markii uu mar kale la wareegay Aqalka Cad. Si kastaba, waxaa hadda la xaqiijiyay inuu ugu horreyn u safri doono Talyaaniga si uu uga qeyb galo aaska Pope Francis.

Intii uu xilka hayay Trump, wuxuu xiriir dhow la sameeyay Riyadh, waxaana la filayaa inuu mar kale cadaadis ku saaro Sacuudi Carabiya — oo hoy u ah goobaha ugu barakaysan Islaamka — si ay xiriir ula yeelato Israa’iil, taas oo noqon lahayd mid ka mid ah himilooyinkiisa waaweyn ee siyaasadda arrimaha dibadda.

Si kastaba, dagaalka ka socda Gaza ayaa caqabad ku noqday dadaalladaas, iyadoo madaxda Sacuudiga ay si cad u sheegeen in aysan xiriir caadi ah la yeelan doonin Israa’iil ilaa iyo inta aan la aqoonsanayn dowlad madax-bannaan oo Falastiiniyiin ah — arrin uu ka soo horjeedo Ra’iisul Wasaaraha Israa’iil Benjamin Netanyahu.

Socdaalka Trump ee gobolka ayaa sidoo kale kusoo beegmaya xilli Aqalka Cad uu sii wadayo wadaxaajoodyada nukliyeerka ee lala leeyahay Iran, isaga oo isla markaana hanjabaad militari u jeedinaya haddii heshiis la gaari waayo.