Maxay Israel iyo Imaaraadka ku iibsadeen Saciid Deni?

[Deeq A.]

Imaraadka Carabta ayaa saldhiggiisa milatari ee magaalada xeebeedka Boosaaso ee maamulka Puntland, Soomaaliya, ku rakibay raadaarka horumarsan ee EL/M-2084, oo ay soo saartay shirkad Israa’iili ah.

Nidaamkan cusub, oo lagu beddelay kii hore, ayaa leh awood uu ku ogaan karo bartilmaameedyada masaafo dhan 256 mayl-badeed, isagoo kala garan kara wax walba oo ka bilaabma diyaarad-drones oo duulimaad hoose leh ilaa gantaallo riddo dheer ah oo ku socda hawada sare, gaar ahaan kuwa ka dulmara Badda Cadmeed.

Tallaabadan ma aha mid sahlan. Soomaaliya waxay weli ku jirtaa dagaal daba-dheeraaday oo lagula jiro Al-Shabaab iyo kooxda Daacish, iyadoo ay taasi jirto, haddana hoggaanka Puntland ee uu hormuudka ka yahay Siciid Cabdullaahi Deni wuxuu dalka kusoo kordhiyay halis cusub.

Iyada oo loo oggolaaday ciidamada shisheeye in ay ku hawlgalaan teknoolajiyad Israa’iili ah gudaha Boosaaso, Soomaaliya waxaa lagu jiidayaa khilaafaad gobolka ka aloosan oo aysan door ku lahayn, kana faa’iideysanayn—gaar ahaan Yemen-Israa’iil, halkaas oo xoogagga Xuutiyiinta ay si cad u sheegeen inay beegsan doonaan cid kasta oo loo arko inay taageere u tahay Israa’iil.

Goobta raadaarku ku rakiban yahay waxay kusoo beegantay xilli ay sare u kacday xiisadda ka taagan Badda Cas iyo Gacanka Cadmeed, oo durba ay hurinayaan dagaalka Israa’iil ee Gaza iyo weerarrada milatari ee Xuutiyiinta. Hadda oo tiknoolajiyad Israa’iili ah laga hawlgelinayo dhulka Soomaaliya, Puntland waxaa laga yaabaa in si rasmi ah loogu arko bartilmaameed aargoosi oo uga yimaada xoogagga Yemen.

Si tan loo fahmo, waxaa muhiim ah in la eego tusaalaha Jabuuti, waddan martigeliyay saldhigyo ciidan oo ay leeyihiin shan quwadood oo waaweyn sida Maraykanka, Faransiiska, iyo Shiinaha. Inkasta oo ay si toos ah ula siman tahay dhulka ay maamulaan Xuutiyiintu, Jabuuti waxay si xeel dheer uga fogaataa in laga duqeeyo dhulka Yemen—guul diblomaasiyadeed oo la isku raacsan yahay.

Siciid Deni se wuxuu doortay waddo kale—mid uu ku saxiixayo heshiisyo dibadeed oo la xiriira dan dhaqaale oo ku kooban muddo gaaban. Isaga oo oggolaaday rakibidda raadaarkan, wuxuu halis geliyay madax-bannaanida Soomaaliya, wuxuuna dalka kusoo jiiday cadow cusub oo loo adeegsado danaha shisheeye.

—Maxay tahay qiimaha dhabta ah ee lagu beddelay qarannimada?
—Imisa ayaa lagu kala iibsaday si Boosaaso loogu rogo meel laga hago dagaalka gobolka?

Doollar kasta oo jeeb la geliyo, bulshada Soomaaliyeed waxay la kulmaysaa halis hor leh.