Saacid oo shaaciyay arrin xasaasi ah oo Xasan Sheekh uu kala hadlay, ayna qarisay Villada

[Deeq A.]

Muqdishi (Caasimada Online) – Ra’iisul Wasaarihii hore ee Soomaaliya, Cabdi Faarax Shirdoon Saacid ayaa shaaciyay in kulankii shalay ka dhacay Madaxtooyada uu madaxweynaha Soomaaliya, Xasan Sheekh Maxamuud kala hadlay arrimaha doorashooyinka ee lagu muransan yahay.

Saacid ayaa sheegay in madaxweyne Xasan Sheekh Maxamuud iyo Ra’iisul Wasaare Xamza ay isla meel dhigeen sidii xilligaan adag Soomaaliya uga gudbi lahayd, taas oo uu sheegay inay ku imaan karto “in midnimo iyo wadatashi lagu hago siyaasadda guud ee dalka.”

“Waxaan kala hadlay madaxda dalka in arrimaha cakiran ee amniga iyo siyaasadda loo furdaamiyo si wadatashi ku dhisan,” ayuu yiri ra’iisul wasaarihii hore ee Soomaaliya, Mr Saacid oo sidoo kale ah musharax madaxweyne.

Wuxuu intaas kusii daray: “In si gaar ah arrimaha doorashooyinka iyo wax ka beddelka dastuurka lagu saleeyo wadar ogol iyo sidoo kale In ummadda Soomaaliyeed ay u midoobaan ciribtirka argagixisada dalka aafeysay, loona sameeyo dib-u-habeyn iyo dhiirrigelin ciidamada Qaranka.”

Villa Somalia oo shalay qoraal kasoo saartay kulanka madaxweynaha Soomaaliya, Xasan Sheekh uu la yeeshay Saacid ayaa xusin in labada masuul ka wada-hadleen arrimo la xiriira hanaanka doorasho ee lagu muransan yahay.

“Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ku guda jira latashiyada qaran ee uu la qaadanayo waxgaradka, masuuliyiinta iyo haldoorka bulshada Soomaaliyeed ayaa Madaxtooyada Qaranka ku qaabilay Ra’iisul Wasaare hore Mudane Cabdi Faarax Shirdoon,” ayaa lagu yiri qoraalka Villa Somalia kasoo baxay.

Sidoo kale waxaa lagu yiri: “Madaxweynaha iyo Ra’iisul Wasaaraha ayaa ka wada hadlay xaaladda dalka iyo xoojinta dowlad-dhiska Soomaaliya, waxayna isla qaateen muhiimadda dagaalka ka dhanka ah argagixisada iyo garab istaagga Ciidamada Qalabka Sida ee naftooda u huraya shacabka Soomaaliyeed.”

Saacid oo ka mid ah musharaxiinta Madaxweyne ee Soomaaliya, dhawaana kusoo laabtay dalka ayaa kulankan maalin ka hor jeediyey hadal si weyn loogu weeraray, kaasi oo ku sheegay in muddo kooban oo Muqdisho u joogay uu arkay in kooxda Al-Shabaab ay caasimadda qabsan rabaan.

Wuxuu sheegay in Ex-control Balcad iyo Ex-control Afgooye ay Shabaab ku soo dhawaadeen difaaca ciidamada qaranka Soomaaliya ayuu sheegay in Muqdisho uu u muuqdo.

Arrimahan ayaa imanaya xilli uu dalku galay xasaasi ah, isla markaana ay deegaano muhiim ah dib ugu laabtay xagmaha argagixisada Al-Shabaab, iyadoo halis ku jiraan degmooyinka hadda xorta ah, taas oo khasab ka dhigeysa in wax laga bedelo qorshaha dagaal ee dowladda.