Xog: Xubno Al-Shabaab ah oo ku dhamaaday qarax ay diyaarinayeen oo ka dhacay…

[Deeq A.]

Cadale (Caasimada Online) – Faah-faahin dheeri ah ayaa laga helayaa qarax culus oo xalay ka dhacay deegaanka Bursha Sheekh ee gobolka Shabeellaha Dhexe, kaas oo ay waxyeelo kasoo gaartay xubno koxoda Al-Shabaab oo qaraxa ku diyaarinayay halkaasi.

Qaraxa oo ahaa miino ayaa sida wararku sheegayaan, waxyeello xooggan kasoo gaartay maleeshiyada Al-Shabaab ee diyaarineysay, waxaana halkaasi dhimasho iyo dhaawac ku noqday xubnihii howshaas ku jiray.

Ilo wareedyo xilkas ah ayaa Caasimada Online u sheegay in qaraxa jugtiisa si weyn looga maqlay tuulooyinka u dhow Bursha Sheekh, iyadoo tiro kamid ah maleeshiyada ay goobta ku dhinteen, halka kuwa kalena ay ku dhaawacmeen.

Wararka ayaa sidoo kale sheegaya in Al-Shabaab ay qaraxaasi doonayeen inay ku aasaan waddooyinka deegaanka, si ay ugu beegsadaan ciidamada isticmaala halkaasi.

Bursha Sheekh ayaa kamid ah meelihii ugu dambeeyay ee ay soo galeen maleeshiyaadka argagixisada ah, waxaana hadda halkaasi isku horfadhiya ciidamada dowladda iyo kuwa deegaanka oo dhinac ah iyo xubnaha kooxda Al-Shabaab.

Ma jiro illaa hadda wax hadal ah oo kasoo baxay dhinaca Al-Shabaab oo ku aadan qaraxa khasaaraha culus kasoo gaaray dagaalyahannadooda ee ka dhacay halkaasi.

Dhowaan ayay ahayd markii qarax ka dhacay aagga deegaanka Masaajid Cali Gaduud ay waxyeelo kasoo gaartay xaasas iyo carruur ay dhaleen xubnaha kooxda Al-Shabaab.

Gobolka Shabeellaha Dhexe ayaa haatan ku jiro xaalad adag kadib markii ay kooxda Al-Shabaab culeys kusoo kordhisay, iyadoo hadda halkaasi ay ka socdaan howlgallo wadajir ah oo ay fulinayaan ciidamada dowladda Federaalka, maamulka HirShabelle iyo dadka deegaanka, iyadoo hawada ay taageero ka siinayaan diyaaradaha saaxiibbada caalamiga ah.

Marar badan ayay sidan oo kale maleeshiyaadka Al-Shabaab khasaaro ugu soo gaareen qaraxyo ay diyaarinayeen, waxaana dhacdado kale ay horay uga dhacday deegaanka Beerayabaal ee gobolka Hiiraan, halkaas oo ay ku dhinteen ilaa 6 xubnood oo ka tirsan kooxda Al-Shabaab kadib markii gurigii ay qaraxa ku diyaarinayeen uu qarxay.

“Maleeshiyaad ka tirsan Khawaarijta ayaa ku geeriyooday qarax ay sameynayeen xilli ay ku sugnaayeen guri ku yaalla deegaanka Beerayabaal ee gobolka Hiiraan,” ayaa lagu yiri qoraal ay horay u baahisay dowladda Federaalka Soomaaliya.

Waxaa sidoo kale jira qaraxyo kale oo ay ciidamadu ka hortageen, iyadoo dhowaan ciidamada dowladda iyo kuwa deegaanka ay burburiyeen baabuur ay qaraxyo kasoo buuxiyeen xubnaha kooxda Al-Shabaab.