Daawo: Khasaaraha weerarkii hoobiye ee Muqdisho iyo qoys ku waayey dhowr qof

[Deeq A.]

Muqdisho (Caasimada Online) – Waxaa weli isaa soo taraya khasaaraha ka dhashay tiro hoobiyeyaal ah oo saaka ku soo dhacay xaafada ka tirsan magaalada Muqdisho, gaar ahaan degmooyinka Xamarweyne, Xamarjajab iyo Waabari ee gobolka Banaadir.

Inta la xaqiijiyey waxaa weerarkan ku dhintay ugu yaraan laba qof, halka ay ku dhaawacmeen 5 kale oo dhammaantood shacab ah.

Mid kamid ah hoobiyeyaasha ayaa ku dhacay xaafadda Unicef ee degmada Xamarjajab, waxaana waxyeello xooggan ay kasoo gaartay qoys degan halkaasi.

Laba kamid ah carrruurta qoyska oo danyar ah ayaa dhimasho iyo dhaawac ku noqday hoobiyaha, kadib markii uu kusoo dhacay gurigooda.

Hooyada qoyska oo la hadashay Telefishinka Universal ayaa sheegtay in gabar yar ay uga dhimatay, wiilna uu uga dhaawacmay hoobiyeyaashii saaka lasoo tuuray.

“Saaka labada canug dugsi ayaa u dirsaday, kadib hoobiye ayaa kusoo dhacay hal gabar ayaa iga dhimatay, wiilkana isbitaalka ayuu jiraa” ayay tiri hooyada dhashay carruurta.

Sidoo kale waxa ay sii raacisay “Gabadha 12 jir ayay ahayd, wiilka dhaawaca ahna 13 jir waayay, waxaan dareemayaa xanuun saa’di ah”.

Xaaladda ayaa haatan ah mid deggan, mana jiro wax hadal ah oo kasoo baxay saraakiisha laamaha ammaanka dowladda federaalka oo ku aadan weerarka hoobiyeyaasha ah ee saaka ka dhacay magaalada Muqdisho ee caasimada Soomaaliya.

Dhowaan ayay ahayd markii sidaan oo kale tiro hoobiyeyaal ah loogu garaacay nawaaxiga Madaxtooyada, iyada oo mid kamid a uu ku dhacay xarunta Tiyaatarka Qaranka, waxaana ku dhaawacmay qof kamid ah howldeennada Tiyaatarka.

Marar badan kooxda Al-Shabaab ayaa sidaan oo kale hoobiyeyaal ugu garaacday caasimada, waxaana lagu bartilmaameedsaday madaxtooyada iyo xerada Xalane.

Weerarkaasi waxaa kasii horreeyay mid kale oo isna lagu qaaday garoonka Aadan Cadde oo madaafiic lagu garaacay, xilli uu kasoo degagay ra’iisul wasaaraha Itoobiya oo booqasho hal maalin ah ku yimid magaalada Muqdisho, kadibna dib uga laabtay.

Waxaa kale oo xigay weerar kale oo hoobiyeyaal ah oo Al-Shabaab ay ku garaaceen xaafado ka tirsan degmada Afgooye ee gobolka Shabeelaha Hoose, kaas oo isna gaystay khasaare kala duwan.

Dhammaan weeraradan ayaa kusoo aadayo xilli haatan dowladda Soomaaliya ay dagaal adag kula jirto Khawaarijta, isla markaana la’isku hayo furimaha hore ee dagaalka.

Kooxda ayaa muddooyinkii u dambeeyay xoogga soo saartay Shabeelooyinka oo haatan ay ka socdaan dagaallada, waxaana sidoo kale lagu arkay deegaanno u dhow Muqdisho, sida Ceelasha Biyaha, Lafoole, Xaawo Cabdi iyo dhinaca waddada aada degmada Balcad.