Dowladda Imaaraadka Carabta oo beenisay inay ka qeyb-galayso duulaanka uu Mareykanku qorshaynayo inuu ku qaado dalka Yemen

[Deeq A.]

Maamulka Trump ayaa qorshaynaya inuu duulaan dhanka dhulka ah ku qaado dalka Yemen, gaar ahaan deegaannada ay maamulaan kooxda Xuutiyiinta ee gacan saarka la leh dowladda Iran, waxayna Washington dadaal xoogan gelinaysaa inay duulaankaas qeyb ka noqdaan dalalka gobolku.

Boqortooyada Sucuudiga ayaa dhowaan shaacisay inaysan diyaar u ahayn ka qeyb-galka howlgalkaas oo ay u aragto mid nabad-gelyadeeda halis gelin kara, balse warar ay warbaahinta Carabta iyo reer galbeedku baahiyeen ayaa sheegayay in dowladda isku tagga Imaaraadka carabta ay qorshahan si weyn ugu gacansiinayso maamulka Trump, islamarkaana ay isku dayayso inay dowladaha carabta ku qanciso inay ku biiraan howlgalkaas.

Wakaaladda wararka ee Reuters ayaa’se ka soo xigatay kaaliyaha wasiirka arrimaha dibadda Imaaraadka Carabta ee Arrimaha siyaasadda in wararka ku saabsan ka qayb-galka Imaaraadka ee wada-hadallada ku aaddan duulaanka Yemen ay yihiin kuwo been-abuur ah oo sal iyo raad lahayn.

Mareykanka ayaa dalalka Sucuudiga, Imaaraadka, iyo Masar u arka xulafadiisa ugu muhiimsan ee kaalin weyn ka qaadan kara gulufka militari ee uu ku qaadayo kooxda Xuutiyiinta, balse dalalka ayaa u muuqda inay xilligan diyaar u ahayn ka qeyb-galka duulaankaas, ayadoo ka cabsi qaba in nabad-gelyooda guduhu ay halis gasho maadaama ay Xuutiyiinta haystaan gantaallo ay meel walba oo gobolka kamid ah ku garaaci karaan.

Source: goobjoog.com