Geedi oo su’aalo xasaasi ah ka keenay sababta Al-Shabaab u qabsadeen Sh/Dhexe

[Deeq A.]

Muqdisho (Caasimada Online) – Ra’iisul Wasaarihii hore ee Soomaaliya Cali Maxamed Geedi ayaa deegaanada ay qabsatay kooxda Al-Shabaab ee gobolka Shabeellaha Dhexe wuxuu ka soo saaray qoraal uu ciwaan uga dhigay “CEEB IYO SHARAF DHAC.”

Geedi ayaa soo qaatay sawirrada lix kamid ah degmooyinka dib loo qabsaday oo Aadan-yabaal ay ugu dambeysay ayaa dhowr su’aalood ka keenay sababta keentay fashilka sababay inay guuleystaan Al-Shabaab, dibna u qabsadaan deegaano labo sano ka hor laga xoreeyey.

Ra’iisul Wasaare Geedi ayaa ku taliyey in lala yimaado istarateejiyad siyaasadeed, mid dagaal iyo mid difaac oo heshiis lagu wada yahay, si looga adkaado, loona ciribtiro cadawga Al-Shabaab.

Hoos ka akhriso qoraalka Geedi:

Qaranka iyo bulshada degmooyinka sawirka ka muuqda, waxaa ceeb iyo sharaf dhac ku ah in magaalooyinkan aad arkaysaan oo cadawga khawaarijta argagixisada ah laga xoreeyay muddo 2 sanadood ka hor ah, misana Al Shabaab ay dib u qabsadaan.

Haddaba, su’aashu waxay tahay, maxaa keenay fashilka dagaalka iyo in cadawgu uu guuleysto ? Ma siyaasad xumi baa ? Ma ciidan yari baa (tiro, tayo iyo hub) ? Ma qorshe la’aan baa ? Ma taakulayn la’aan baa ? Ma wada shaqayn la’aan baa ?. Ma la dhihi karaa, sababaha fashilka waxaa caadayn kara ama qeexi kara jawaabaha rasmiga ah ee loo helo su’aalaha sare oo isbiirsaday.

Waa la hubaa in khawaarijtu aanay ku waari doonin, balse sow waqtiga ay joogto baabi’in meyso mashaariicdii horumarineed ee dowladnimada lagu hirgeliyay ? sida Isbitaalladii ? Iskuulladii ? Dugsiyadii quraanka ? Masaajiddii ? Ceelashii biyaha ? Xarumihii amniga ? iyo goobihii ganacsiga ?

Sow in dib loo xoreeyo, oo lama huraan ah , maneheedu ma ahan in mar kale lagu bixiyo maskax, maal iyo dhiig badan oo daata ?  Haa…intaba waa lagu bixinayaa iyadoo aan weiba loo kala harin dowlad iyo dadweynaba.

Sidaas darteed, waxaan ugu baaqayaa dowladda federaalka ah ee Madaxweyne Xasan Sheikh Maxamuud iyo dowlad-goboleedka HirShabeelle ee uu horkacayo MW Cali Guudlaawe iyo sidoo kale hay’adaha dowladda ee heer federaal iyo heer maamul hoboleedba oo kaashanaya shacabkooda inay la yimaadaan istarateejiyad siyaasadeed, mid dagaal iyo mid difaac oo heshiis lagu wada yahay, si looga adkaado loona ciribtiro cadawga arxan laawaha ah ee ku soo gardarrooday dadkeenna iyo dalkeenna.

Baaqaygani wuxuu ku socdaa dhamaan dowlad-goboleedyada iyo bulshada Soomaaliyeed inay u istaagaan la dagaallanka Al Shabaab iyo Daacish si dadkeenna iyo dalkeennu ay u helaan nabad iyo xasillooni iyo horumar waara.