Warbixin xariirka ka dhexeeya caafimaadka iyo cuntooyinka wadniga ah

[Deeq A.]

Ku tiirsanaanta cuntooyinka wadniga ah iyo wax soo saarka gudaha waxaa ku jira 3 faa’iido oo waaweyn kuwaas oo kala ah; mid dhaqaale, mid caafimaad, iyo nabad-gelyo.

Ugu horreyn dalagyada ka soo go’a gudaha dalku way ka tayo iyo nuxur badanyihiin kuwa dibedda laga soo dhoofiyo, waxayna dhaqaatiirtu xaqiijiyeen in wax soo saarka beeraha Soomaalidu uu bedqabka iyo caafimaadka aad ugu wanaagsanyahay.

Raashinka ka soo go’a beeraha dalku wuxuu u badanyahay cuntooyin qolof leh, sida galleyda, digirta, Masegada, qamadiga, iyo qutaarta, kuwaas oo dhammaantood ay bahda caafimaadku dadka kula taliyaan inay isticmaalaan, badelka bariiska,burka, iyo baastada intooda badan dibedda laga keeno.

Dhanka kale xoolaha nool iyo kalluunka dalka ayaa lagu tiriyaa in hilibkooda uu waxtar iyo nafaqo dheeli-tarin leeyahay, taas oo meesha ka saaraysa cudurro badan oo ka dhalan lahaa cuntooyinka aan nuxurka iyo tayada feecan lahayn.

Dhanka kale ku tiirsanaanta cuntooyinka wadniga ah waxaa ku jira faa’iido dhaqaale iyo mid amni oo dalku isku filnaasho ayuu gaarayaa haddii wax soo saarka gudaha la xoojiyo, nolosha maalin laha ahna lagu jaangooyo dalagyada beeraha gudaha.

Sidoo kale madax-bannaanida dalka ayay saameyn ku leeyihiin waxyaabaha dibedda laga soo dhoofiyaahi, maxaa-yeelay dowladdii aan wax soo saarkeeda guduhu ku filnayni waxay u nugushahay, faragelin siyaasadeed, gorgortan maslaxad ku dhisan, cuna-qabataynno, iyo canshuuro xad-dhaaf ah.

Haddaba Soomaaliya oo ah dal Alle siiyay kheyraad walboo dabiici ah, xoolo nool oo duunyo iyo kalluun isugu jira, iyo dhul beereed webiyo iyo carra-sanba isugu jira ayaan la ogeyn xilliga ay ka faa’iidaysan doonto nimcada Illaahay siiyay, ayna ka maarmi doonto deeqaha shisheeye ee danaha gurracan xambaarsan.

 

Source: goobjoog.com