Puntland oo beenisay in ay shaqa joojin ku samaysay diyaaraddii Laascaanood keentay Ra’iisul wasaare Xamse

[Deeq A.]

Dowladda Puntland oo bayaan kooban soo saartay ayaa beenisay wararka ku saabsan in ay shaqa-joojin ku samaysay diyaaraddii maanta Laascaanood geysay Ra’iisul wasaaraha xukuumadda Federaalka Soomaaliya, Xamse Cabdi Barre.

Warsaxafadeed kooban oo ka soo baxay wasaaradda Duulista hawada iyo garoomada Puntland ayay ku caddaysay in ay waxba kama jiraan yihiin wararka sheegaya in Puntland shaqa-joojin ku samaysay diyaaraddii soo qaadday Ra’iisul wasaare Xamse, kaddib markii baraha bulshada ku faaftay warqad been-abuur ah oo ay ku qoran tahay shaqa-joojintaasi.

“Wasaaradda Duulista Hawada iyo Garoomadda Puntland, waxay dadka Soomaaliyeed gaar ahaan reer Puntland u caddeynaysaa inaysan jirin wax diyaaradda ah oo ay shaqada ka joojisay. Sidoo kale waxaan caddaynayna wararka social media kujira ee sheegaya in diyaarad shaqada laga joojiyay ay been abuur yihiin” ayaa lagu yiri warsaxaafadeedka ka soo baxay dowladda Puntland.

Halkan ka akhriso Warsaxaafadeedka

PUNTLAND POST

The post Puntland oo beenisay in ay shaqa joojin ku samaysay diyaaraddii Laascaanood keentay Ra’iisul wasaare Xamse appeared first on Puntland Post.