Waa wax lagu qoslo in aan ka tanaasulay musharaxnimada golaha wakiilada

[Deeq A.]

BEENIN WAR BEEN-ABUUR AH

Qarannews (5 April), Xarunta war-qabadka Qarannews ayaa waxa xalay soo gaadhay war shegayay in Musharax Ahmed Aden Ismail (Keyse Gurey) uu ka tanaasulay hankiisii ahaa in u noqdo musharaxa Golaha Wakiiladda ee Gobolka Togdheer, doorashada isku-sidkan ee Golaha Wakiilada iyo ta degaanka ee lagu wada in ay ka qabsoonto
dalka May, 2026. Warkaasi oo la sheegay in uu ka shaaciyay shir ay isku yimaadeen labaataneeyo dhallinyaro ah oo ka dhacay Maamuus Hotel shalay galabnimadii. Hadaba, si aan wax uga ogaano jiritaanka iyo xaqiiqda warkaasi ayaa waxa aanu la xidhiidhnay Keyse Gurey oo ku markaasi ku sugnaa gurigiisa uu ka degan yahay magaalada Hargeysa subaxnimadii saaka.
Waxa uu Keyse yidhi “walaal annigu shirkaasi ma joogin waxaana soo qaban qaabiyay nin dhallinyaro ah oo isna hore u sheegay in uu yahay musharax. Mana garanaayo meesha uu warkaasi ka yimid, balse waxa uu u eegyahay in uu yahay mid sameys (macmal) ah. Waxaanse idinka iyo cidii kale warkaasi gaadhayba u cadeynaya in warkaasi waxba ka jirin. Anniga oo ka faa’iideysanaya fursadan, waxa kale oo aan dhawaaq dheer ku sheegayaa in aanu jirin shir reerku ku balansan yahay oo lagu kala reebaayo musharaxiinta reerka. Balse waxa jiray shir ay ka soo qeyb galeen ergooyin oo ka qabsoomay Burco, 22-23/02/2025 oo ku saabsanaa magaha iyo qoomaha ku taagan reerka. Shirkaasi oo aan dhicin sidii la rabay ayaa loo balamay marka uu roobku da’o (xilliga gu’ga) in la iskugu yimaado Shirweyne. Marka doorashada is qorto ama si dhab ah loo ogaado waqtiga ay qabsoomeyso ayaa la kala ogaan doonaa musharaxa ay isku raacaan reerku, hadii allah yidhaahdo. Waxa aan kaga baxayaa hadalkayga, ma aha wax iyo ama sunne fiican in xildhibaankii reerka oo weli ku fadhiya kursigii, muddo xileedkiisina dhamaan la isku dul qabsado.

Qaran News