R/W Xamza oo magacaabay guddi ka kooban 7 xubnood + Shaqada ay qabanayaan

[Deeq A.]

Muqdisho (Caasimada Online) – Ra’iisul Wasaaraha Xukuumadda jamhuuriyadda Federaalka Soomaaliya, Xamza Cabdi Barre, ayaa maanta magacaabay Guddiga Qaran ee Taakuleynta Dagaalka lagula jira kooxaha Khawaarijta ah ee Shabaab iyo Daacish.

Guddigan ayaa ka kooban 7 xubnood, waxaana hoggaaminaya oo guddoomiye looga dhigay ra’iisul wasaare ku-xigeenka labaad ee XFS Cabdisalaan Cabdi Cali.

Guddigan ayaa loo igmaday inay ka shaqeeyaan taakulada dagaalka lagula jiro kooxaha argagixisada ee Al-Shabaab iyo Daacish, oo ciidamada xoogga dalka iyo kuwa Puntland ay kula jiraan dagaal adag.

Magacaabista guddigan ayaa timid kadib kulankii toddobaadlaha ee Golaha Wasiirrada Soomaaliya oo uu maanta shir-guddoomiyey Ra’iisul Wasaare Xamza Cabdi Barre.

Intii uu socday kulanka, Ra’iisul Wasaaraha ayaa golaha uga warbixiyay booqashadii uu ku tagey furimaha dagaalka ee gobolka Shabeellaha Hoose maalintii ciidda, halkaasi oo farxadda ciidda kula soo qaatay geesiyaasha ciidanka xoogga dalka iyo kuwa deegaanka.

Sidoo kale, Ra’iisul Wasaaraha ayaa golaha faray in la joogteeyo taakuleynta iyo garab-istaagga ciidanka qaranka, si looga adkaado cadowga kusoo duulay dalkeenna.

Si kastaba, Xukuumadda Soomaaliya ayaa xoojisay muhiimadda in xubnaha golaha ay joogteeyaan booqashada furimaha dagaalka, si loo dhiirageliyo geesiyaasha qaranka u halgamaya.