DF oo qaaday tallaabo culus oo ay uga hortageyso in Mareykanka aqoonsado Somalilkand

[Deeq A.]

Muqdisho (Caasimada Online) – Dowladda Federaalka Soomaaliya ayaa xoojisay dadaallada ay ku dooneyso inay ka hortagto in Somaliland hesho aqoonsi caalami ah, gaar ahaan dhinaca Mareykanka.

Warbixinno ay baahiyeen warbaahinta caalamiga ah ayaa tilmaamaya in Muqdisho ay la xiriirtay shaqsiyaad iyo ururro saameyn leh, si ay u horjoogsato qorshayaal ay wadaan siyaasiyiin Mareykan ah oo taageersan aqoonsiga Somaliland.

Dowladda Soomaaliya ayaa la sheegay inay adeegsaneyso xeelado kala duwan, oo ay ka mid yihiin la-tashiyo ay la yeelatay shakhsiyaad saameyn ku leh siyaasadda Mareykanka, si ay u xaqiijiso in Washington aysan Somaliland u aqoonsan dal madax-bannaan.

Xukuumadda Soomaaliya ayaa sidoo kale isku dayday inay gaarto dad muhiim ah oo saameyn ku leh go’aannada siyaasadeed ee Mareykanka, iyadoo u jeedadeedu tahay in la xoojiyo mowqifka Muqdisho ee ka dhanka ah aqoonsiga Somaliland.

Warbixin ay baahisay jariidadda The Africa Report ayaa lagu sheegay in Muqdisho ay xiriir la sameysay maalqabeenka sida weyn ugu dhow madaxweyne Trump, Elon Musk, xilli uu Donald Trump ku foogan yahay dib u eegista siyaasadda Mareykanka ee Geeska Afrika.

“Waxay isku dayeysaa inay la xiriirto Trump, kaasi oo aanu xiriir fiican kala dhaxeyn, iyada oo kireysatay kooxo ka caawinaya arrintan, isla markaana la tashanaysa shakhsiyaad ku dhow mashruuca ‘Ka Dhigista Mareykanka Mid Xooggan Mar Kale’ (MAGA),” ayaa lagu yiri warbixinta.

Dhawaan, Madaxweynaha Soomaaliya, Xasan Sheekh Maxamuud, ayaa waraaq uu u diray Donald Trump ugu soo bandhigay la wareegidda maamulka dekedaha iyo madaarrada Berbera iyo Boosaaso, si uu uga hortago in Washington ay Somaliland aqoonsato.

Dhanka kale, hoggaanka Somaliland ayaa dadaal xooggan ugu jira sidii ay u heli lahayd aqoonsi caalami ah, waxaana arrintan hormuud ka ah xubno ka tirsan xisbiga Jamhuuriga ee Mareykanka, kuwaas oo u arka Somaliland dal dimuqraadi ah oo xasilloon, isla markaana leh muhiimad istiraatiiji ah.

Wasiirka Arrimaha Dibadda Somaliland ayaa maalmo ka hor booqasho ku tagay Mareykanka si uu kor ugu qaado dadaallada lagu raadinayo aqoonsiga rasmiga ah ee Somaliland, iyadoo maamulka Hargeysa uu rajo wanaagsan ka muujiyay aqoonsi uu ka helo Washington.

Si kastaba ha ahaatee, Dowladda Soomaaliya ayaa horey u sheegtay in aysan walaac badan ka qabin in Washington aqoonsato Somaliland, oo haatan caalamku ula macaamilo sidii maamul-goboleed ka tirsan Soomaaliya.