Daawo: Dardaaranka Shuute oo waqti badan ku maqan furimaha dagaalka

[Deeq A.]

Aadan-yabaal (Caasimada Online) – Guddoomiyaha Maxkamada Ciidamada darajada koowaad ee ciidamada qalabka sida G/Sare Xasan Cali Nuur (Shuute) ayaa furimaha dagaalka ku maqan tan iyo maalinkii ay kooxda Al-Shabaab weerarka rogaal celiska ah ku soo qaaday gobolka Shabellaha Dhexe.

Shuute oo duruufta furimaha dagaalka ay ka muuqato ayaa gobolka Shabeellaha Dhexe wada abaabul iyo dagaal gelin ciidan, “Maadaama uusan muuqeenu raageyn waxaan rabnaa in magaceenu raago.”

“Shabeellaha Dhexe dagaal aad u adag ayaa ka socda, waa lagu soo duulay dadkaan, geesinimo ayaa loo baahan yahay, Khawaarij madaxooda war ma galo ee mudac ayaa gala, dagaalka aan ku jirno waa mid jihaad ah ee qof kasta kaalin haka geysto, dadkiina deegaanka dowalddu waxay u balan qaadeysaa garab istaag ee ha iska difaaceen cadowga,” ayuu yiri Shuute.

Guddoomiyaha oo maanta meel duur ah oo baadiyaha degmada Aadan-yabaal ah ugu khudbeynayey ciidamo macawiisley ah oo aad loo diyaariyey ayaa sheegay in labo bilood uusan Muqdisho ku laaban.

“Waan idinla joogayaa, dagaalka ayaan wada geleynaa, labo bilood waxaan ku jiray duurkaan, waxaa naga go’an in dalkeena aan Khawaarijta ka difaacano,” ayuu yiri Shuute.

Duruuf lamid ah tii lagu arkay Madaxweyne Xasan Sheekh markii uu Galmudug ka hoggaaminaayey dagaalka Al-Shabaab ayaa maanta ka muuqata guddoomiye Shuute oo door cajiib ah ka qaatay in degmada Aadan-yabaal laga difaaco kooxda Al-Shabaab.

Deegaano badan oo dhinac kasta ka xiga degmada Aadan-yabaal ayaa gacanta u galay Al-Shabaab, kadib markii ay soo qaadeen weerarro culus oo weli lala tacaalayo sidii loo xakameyn lahaa.

“Khawaarijtu waxay khatar ku yihiin, nafteena, maalkeena, sharafkeena iyo wax kasta oo diintu ilaalisay, waxaana loo baahan yahay inaan loo kala harin sidii aan isaga sifeyn lahayn,” ayuu yiri guddoomiye Shuute oo maanta u qudbeynayey ciidamada xaq u dirirka ah ee dadka deegaanka.

Agaasimaha Guud ee wasaaradda caafimaadka Soomaaliya, Taliyaha Booliska HirShabeelle oo toddobaadyo ka hor ku dhaawacmay dagaalka ka socda Sh/Dhexe iyo Ganacsade Liibaan Shuluq ayaa taagnaa garbaha guddoomiye Shuute oo aad ula dardaarmay ciidamada deegaanka ee Macawiisley.

Hoos ka daawo