Qaramada Midoobay oo war kasoo saartay Diyaarad ay laheyd oo cilad ku qabsatay Muqdisho

[Deeq A.]

Diyaarad ay leedahay Qaramada Midoobay oo ku sugan Soomaaliya ayaa maanta si deg deg ah ugu soo degtay magaalada Muqdisho, kadib markii ay cilad ku timid qalabkii ay u adeegsan lahayd degidda.

Diyaaraddan oo uu maamulo Xafiiska Taageerada Qaramada Midoobay ee Soomaaliya (UNSOS), ayaa ku guda jirtay duulimaadkeedii caadiga ahaa ee Muqdisho ilaa Baydhabo markii shaqaalihii la socday ay ogaadeen cilad ka hor istaagtay in taayarradii ay ku degi lahayd diyaaraddu ay si sax ah u shaqeyn waayeen.

Duuliyayaasha ayaa isla markiiba diyaaradda dib ugu soo celiyay Garoonka Caalamiga ah ee Diyaaradaha ee Aadan Cadde ee caasimadda si ay si bedqab leh ay wax ugaga qabtaan arrinta.

Marka laga reebo hal qof oo rakaab ah oo la sheegay in uu dhaawac fudud soo gaaray intii ay socotay hawshii rakaabka looga soosaarayey diyaaraadda, dhammaan rakaabka kale iyo shaqaalaha ayaan wax dhib ah ka soo gaarin.

Qaramada Midoobay ee Soomaaliya waxaa ay bogaadineysay sida degdegga ah ee xirfadaysan ee ay shaqaalaha diyaaradda iyo hawlwadeennada iyo adeegyada xaaladaha degdegga ah ee garoonka ay wax uga qabteen xaaladda, kuwaas oo uu diyaar-garowgooda iyo taageeradooda ay xaqiijiyeen in si habsami leh ay xaaladda u maareeyaan.

“Waxaan bogaadineynaa iskaashiga u dhaxeeya UNSOS iyo Hay’adda Duulista Rayidka Soomaaliyeed ee suurageliyay wax-ka-qabashadan wax-ku-oolka ah,” ayay tiri Madaxa UNSOS, Kaaliyaha Xoghayaha Guud Aisa Kirabo Kacyira.

Source: goobjoog.com