Xiisadda SOMALILAND iyo SSC-Khaatumo oo weji cusub yeelatay – Maxaa cusub?

[Deeq A.]

Laascaanood (Caasimada Online) – Xiisadda ka taagan xuduudka u dhaxaysa Somaliland iyo SSC-Khaatumo ayaa kasii dartay, iyada oo xaaladdu isu beddeshay mid ay ku lug leeyihiin afduubyo lala beegsanayo dadka rayidka ah.

Wararka ka imanaya gobolka Sool ayaa sheegaya in maleeshiyaad hubaysan oo ka tirsan Somaliland ay degaanka Bohol ku qafaasheen dad rayid ah oo ka soo jeeda degmada Xuddun, kuwaasoo hadda lagu hayo magaalada Burco.

Jawaab ahaan, maleeshiyaad kale oo taageersan SSC-Khaatumo ayaa iyaguna qafaashay dad u dhashay Somaliland, taasoo sii hurisay xiisadda colaadeed ee labada dhinac.

Sidoo kale, dhaq-dhaqaaqyo ciidan oo laga dareemayo jiidda hore ee dagaalka ayaa muujinaya diyaar-garow dagaal, iyadoo Somaliland ay xoojinayso ciidamada ku sugan furimaha hore.

Dagaalka labada dhinac ayaa dib u qarxay horraantii bishii hore, xilli ay xukuumadda Somaliland deegaanno ka tirsan Sool ka wadday qorshe lagu qaramaynayo maleeshiyo beeleedyada SSB iyo G36, kuwaasoo samaysmay xilligii ay colaadaha joogtada ahi ka taagnaayeen deegaannadaas.

Inkasta oo xukuumadda Somaliland ay sheegtay inay wada-hadal ku wajahayso arrinta gobolka Sool, oo haatan ay maamusho SSC, haddana marnaba ma joojin abaabulka ay ka waddo jiidda hore.

SSC ayaa dhankeeda xaqiijisay in dagaalka ay kula jirto Somaliland uu sii socon doono, iyadoo hoggaamiyaha maamulka KMG ah uu xusay in Ceerigaabo muhiim u tahay maamulkiisa, halkaasi oo bishii na dhaaftay uu ku sugnaa madaxweyne ku-xigeenka Somaliland.

Si kastaba ha ahaatee, arrimahan ayaa dab kusii shidaya xiisadda u dhexeysa Somaliland iyo SSC-Khaatumo, taasoo caqabad ku noqon karta dadaallada nabadeed ee xal loogu raadinayo colaadda.