Xasan Abgaal oo farriin cajiib ah direy kadib baaqii kasoo yeeray Xasan Sheekh

[Deeq A.]

Garoowe (Caasimada Online) – Siyaasi Xasan Shire Abgaal ayaa ka jawaabay baaqii uu dhawaan diray madaxweynaha Soomaaliya Xasan Sheekh Maxamuud, kaasi oo gogol wadatashi ugu fidiyay siyaasiyiinta mucaaradka iyo saamileyd siyaasadda.

Xasan Abgaal ayaa marka hore si buuxda u soo dhaweeyay gogosha uu fidiyay Madaxweyne Xasan Sheekh, si loo helo talo midaysan oo dalka lagu hago marxaladdan xasaasiga ah.

“Anigoo ka duulaya baahida ba’an ee loo qabo midnimo qaran, is-afgarad siyaasadeed, iyo ka hortagga caqabadaha haysta dowlad-dhiska Soomaaliya, waxaan si buuxda u taageerayaa gogosha wadatashi ee uu ku baaqay Madaxweynaha Jamhuuriyadda,” ayuu yiri.

Sidoo kale wuxuu ugu baaqay dhamaan dhinacyada siyaasadeed ee isdiidan inay u istaagaan danta guud, ayna madaxda qaranka ku garab istaagaan dagaalka kooxaha argagixisada, si loo xaqiijiyo nabad waarta, horumar muuqda iyo dowladnimo sal adag leh.

“Waxaa lagama maarmaan ah in laga fogaado siyaasadeynta halganka qaran ee lagu difaacayo dalka, loona midoobo ilaalinta danaha shacabka iyo qaranimada,” ayuu yiri Xasan Abgaal.

Hoos ka aqriso qoraalka oo dhameystiran;

Anigoo ka duulaya baahida ba’an ee loo qabo midnimo qaran, is-afgarad siyaasadeed, iyo ka hortagga caqabadaha haysta dowlad-dhiska Soomaaliya, waxaan si buuxda u taageerayaa gogosha wadatashi ee uu ku baaqay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud.

Tallaabadan geesinimada leh waa astaanta hoggaan masuul ah, kana tarjumaysa rabitaan dhab ah oo lagu xoojinayo midnimada shacabka Soomaaliyeed, lana dardargelinayo hanaanka dhismaha dowladnimo loo dhan yahay.

Waa fursad taariikhi ah oo aan la dayici karin, si wadajir looga hortago dhibaatooyinka dib-u-dhigay horumarka ummadda Soomaaliyeed.

Waxaan si xushmad leh ugu baaqayaa dhammaan siyaasiyiinta Soomaaliyeed in ay u istaagaan danta guud, ayna garab istaagaan Madaxda Qaranka, si loo suuliyo khatarta Khawaarijta, loona xaqiijiyo nabad waarta, horumar muuqda, iyo dowladnimo sal adag leh. Waxaa lagama maarmaan ah in laga fogaado siyaasadeynta halganka qaran ee lagu difaacayo dalka, loona midoobo ilaalinta danaha shacabka iyo qaranimada.

Sidoo kale, waxaan ku dhiirrigelinayaa in aan dhigno aasaas adag oo ku saleysan midnimo, wadajir iyo is-aaminaad, si aan u dhisno mustaqbal Soomaaliyeed oo barwaaqo ah, ka foga khilaafaadka siyaasadeed ee ragaadiyey horumarka iyo dowlad-dhiska dalkeenna.

Ugu dambayn, guusha dhabta ah waxay u sugnaatay shacabka Soomaaliyeed ee si mideysan ugu istaagay difaaca qarannimadooda, islamarkaana garab taagan Ciidamada Qalabka Sida ee naf-hurnimada ugu jira xoraynta dhulka iyo ilaalinta karaamada qaranka.

Soomaaliya ha noolaato! Horumar ha lagu gaadho midnimo, xasillooni iyo dowladnimo waarta!